Rêl kawng siam chungchangah Sorkar leh RITES-in MoU an ziak
Mizorama rél kawng siam hna thawh mek leh hmalak zelna tur chungchangah nimin khan Railways minister of state Darshana Jardosh leh chief minister Zoramthanga hoin Chief Minister's Office-ah inhmuh khawm a ni a; Mizoram sorkar leh Rail India Technical and Economic Service (RITES)-te'n thawhhona thuthlung, memorandum of understanding an ziak.
Darshana Jardosh chuan, Bairabi-Sairang rél kawng siam mek chu mipuiin an hman ṭangkai thuai theih nan a huna thawk zo ngei turin thawktute a beisei thu a sawi a; state páwna hralh chhuahna tur hmun Mizoramin a neih theih nan bawhzui ngaite bawhzuipui a tum thu a sawi.
CM Zoramthanga chuan, Mizoram chu ram dang nena inrî a nih avangin insumdawn tawnna leh thil dangah India ram tan pawimawhna a neih thu sawiin, "India state dangte nen inkalpawhna kawng ṭha siam belh zel a pawimawh a, a bik takin India hmarchhak state zawng zawnga rél kawng siam belha tihchangtlun a pawimawh," a ti.
Mizoram Transport Secretary-in Ministry of Railways aṭanga puihna mamawh dan sawiin, Bairabi-Sairang rél kawnga rél chawlhhmun panna tur kawng siam a nih theih nan sorkar laipuiah November 2021 khan project a thehluh tawh thu a sawi.
Mizoram sorkar leh RITES thuthlungah hian Mizoram sorkar aiawhin Planning & Programme Implementation secretary Lalmalsawma Pachuau-in hming a ziak a; RITES aṭangin general manager CL Shah-in hming a ziak thung. Transport secretary KT Beicho leh RITES deputy general manager JC Das te chu hriatpuitu an ni.