Ruihhlo doah Central YMA-in Sorkar kal dan an ngaichâng

Central YMA chuan tun hnaia ruihhlo hluar thar do chungchangah Mizo­ram sorkar hmalak­na an ngaichâng a, sorkar hmalak dan azirin an kal zel dan tur an ngaihtuah dawn.

Vanglaini palai zawhna chhangin CYMA president R Lalngheta chuan, ruihhlo do turin State Level Core Commi­ttee on Ruihhlo Do tuaithar leh tura ngen­na Chief Minister hnenah an thlen tih a sawi a, "Chief Minister hmalak­nain committee hi koh a ni tawh. Committee ṭhutkhawm a nih hnuah sorkar hmalak dan tur a hriat theih ang," a ti.

CYMA President chuan, CYMA chuan ruih­hlo do committee thutlukna an ngaihchàn phawt dawn thu sawiin, "Committee hmalak dan tur azirin kan kal zel dan tur ngaihtuah a ni ang. Ruihhlo donaah hian sorkar tel lo chuan thil tih tak tak a harsa ṭhin," a ti a, sorkar hmalakna hnuaia ruihhlo do a ṭhat ber thu a sawi.

Tun hnaia ruihhlo hluar chhan nia a hriat zawhna chhangin R Lalngheta chuan, "Pawl ang chuan sawihona kan nei lo. Keima mimal ngaihdanah chuan Myanmar buaina avang a nih ka ring. An ram buaina avangin mipui tan eizawnna tur a váng em em a, chuvangin ruihhlo tawlh lamah an ṭuan hlawm a nih a rinawm," a ti.

Hetih lai hian, chief minister Zoramthanga kaihhruai State Level Core Committee on Ruihhlo Do chu nimin khan Assembly Annexe conference hall-ah an ṭhukhawm.

Ṭhutkhawmah hian ruihhlo (drugs/psychoactive substance) leh zu do te, Core Commi­ttee member atan School Education Minister leh department official telh te, MHIP, MZP leh MZU aiawh telh te, rorelte bawhzui turin Social Welfare Minister kaihhruai Working Committee din te, kohhran leh tlawmngai pawlte hmalakna tichak lehzual turin School Education hnuaia zirna-in zawng zawngah awareness programme neihte an rêl.

Core Committee-ah hian Health Minister, Social Welfare Minister, Law & Judicial Minister, Chief Secretary, Police, Excise & Narcotics leh a kaihhnawih sorkar department aiawh official, Central YMA, Mizoram Kohhran Hruaitute Committee leh Mizoram Journalists Association aiawhte an tel a ni.