Raltlante thlavâng hauh kawngah CM leh minister-te an ṭang ná - LS MP

Lok Sabha MP C Lalrosanga chuan nimin khan Mizo Hnam Runa inkhawm ah thu sawiin,"Myanmar lam aṭanga râltlân lo lut, kan unaute thlavâng hauh kawngah kan CM leh minister-te an ṭang na em em a, keini pawh Parliament-ah kan ṭan nat ngam phah a ni," a ti.

C Lalrosanga chuan, Myanmar ráltlân te tan theihtawp an chhuah mek tih sawiin, "Ṭanpuina pe tur pawhin sorkar laipui kan dawr kual zel," a ti a; Chief Minister hmalakna zarah sorkar laipui chu ráltlân chhawmdawl kawngah an hmin chho mek niin a sawi.

Mizoram MP-te'n palai hna an thawk ber tih sawiin C Lalrosanga chuan, "Mizoram sorkar leh sorkar laipui inkarah te, mipui leh minister inkarahte kan thawk a ni ber," a ti a; Covid-19 avangin kum hnih leh a chanve dáwn an buai tih sawiin, "Covid dona kawngah MP fund min cut sak a, hlawh min cut sak bawk a. MP mal mah ni ila kan zam bik hauh lo a, kan tih theih ang chinah kan tlânchhe lo," a ti.

Mizoram MP chuan, Aizawl khawpui aṭanga Assam Rifles sawn chhuah chungchang chu Parliament-ah a auchhuahpui tih sawiin, “Home minister Pu Amit Shah pawh nikum kum tàwp lam khan ka hmu a, AR sawn chhuah chungchang chauh ka sawipui. Home Secretary-ah kan nawr zel,” a ti a; AR sawn chhuahna turah hmasawnna hmel a lang ṭan zel dáwn niin a sawi.

C Lalrosanga chuan, Mizoram sorkar hotute’n Delhi lama bawhzui ngai an neih kawngah amah pûr hreh lo turin a ngen a; central sector lam chi reng rengah company lian emaw, sorkar laipui company-te’n an tih tur ṭha taka an tihhlawhtlin theih nan theihtawp a chhuah zel thu sawiin, Parliament-a au chhuahpui tura duh nei an awm chuan a hnenah rawtna thlen turin a ngen a ni.