Congress vanga ramin remna leh muanna A neih hlutzia chhût turin mipui chah

Mizoram Pradesh Congress Committee (MPCC) treasurer Zodin­tluanga Ralte chuan, Congress party avanga Mizoramin remna leh muanna a neih hlutzia chhût nawn ṭhin turin mipui a chah.

Nimina Congress Bhavana inkhawm­ah Zodintluanga chuan, Congress party chu lalna leh thuneihna kiantu a nih avangin danglam bikna a nei tih sawiin, "Khawvel hmun tam takah lalna an duh avangin thisen tam tak a luang a, mipuiin an tuar a, Mizoramah pawh lalna inchuh avangin ráltlân tam tak an awm phah. Congress party chuan remna leh muanna a awm theih nan lalṭhutthleng kan kian thei tlat a, Congress avanga Mizoramin remna leh muanna a neih hlutzia hi i chhût nawn ṭhin ang u," a ti.

Zodintluanga Ralte chuan, Mizo­ramah Congress an sorkar apiangin sorkar budget, mipui sum chu mipui hnenah a lêt leh ṭhin nia sawiin, "Congress sorkar hmasak khan kan budget a la tlem lutuk, chuti chungin NLUP Rs 30,000 kan sem thei. Development a kal ngaia kal reng chungin a hnuah Rs 1,00,000 kan sem leh mai. Tuirial Hydel Project kan din thei a, medical college pawh kan din thei," a ti a; sum enkawl thiam, sum harsatna laka Mizoram chhan chhuak thei tur Lalsawta hoa sorkarna an siam leh a ngaih thu a sawi.

MNF sorkar hnuaiah Mizoramin hmasawnna lian tham a neih zawhna siamin Zodintluanga chuan, "MNF sorkarah mi rethei zawkte'n eng nge an dawn tawh? Khawiah nge cheng nuai 3 an sem? Khawiah nge an kawng chhâwng siam chu? Sum a tamzia sawi ringawt a ni lo a, finance management thiam a ngai," a ti.

MPCC Treasurer chuan, Congress party chu a thochhuak leh dawn tih sawiin, "ZPM hi an bul ṭanna a sáng lutuk a, tunah chuan an ṭhan a tàwp tawh a, hmasawn ngaihna an hre tawh lo. An hotute inngeih lohna, siamṭhat ngaihna an hriat miah loh hian ZPM hi a vaw chhe dawn," a ti a; Congress party chu nasa takin an insiamṭha mek a, an president Lalsawta'n siamṭhat hna nasa takin a thawk mek niin a sawi.

Aizawl East-II bialtu MLA minister Robert Romawia Royte chu a biala hmasawnna hnathawh enpuiah sáwmin Zodintluanga chuan, "East-II biala veng tina Pu Lalsawta hmasawnna hnathawh leh Pu Robert Romawia hnathawhte hi engtik lai pawhin enho kan cho a ni," a ti.