MLA aṭangin Duhoma bàn a ni

MNF MLA 12-te chuan, Lalduhoma'n Indian Constitu­tion 10th Schedule Para 2(2) a bawhchhia nia ngaiin September 22 leh 24 khan MLA a nihna aṭanga bàn (disqualify) turin Speaker-ah ngenna/hêkna an thlen. Lalduhoma chu independent ticket-in MLA atan thlan a ni a, MLA a niha a thil tih zawng zawngin ZPM party a zawma a lan avangin dan bawhchhiaah an ngai a ni.

Assembly Speaker chuan, engti zawng pawhin thutlukna siam nuam lo tak a nih thu sawiin, "Ka koah a tla miau a, ka ti lo thei si lo. Hetiang case chungchanga Parliament leh state legislature hrang hrang kalpui dan, speaker-te'n ruling an lo siam tawhte la khawmin uluk taka zir a ni. Assembly session lai ni se chuan House-ah chhiar chhuah tur a ni," a ti.

MLA 12-te complaint thehluh chu dan anga tih a nih avangin a pawm thu sawiin Lalrinliana Sailo chuan, "Danah chuan Pu Duhoma hi ni sarih chhung insawifiahna hun pek tur a ni a, Speaker-in ṭul a tih chuan a aia rei a pek theih tur thu tarlan tel a nih avangin hun tháwl a neih theih nan ni 14 hun pek a ni," a ti a; Lalduhoma'n a insawifiahna October 8-ah a thehluh thu a sawi.

Petition thehluhah dan zawm famkim loh a awm avangin petition chu hnâwl turin Lalduhoma'n a ngen thu sawiin Speaker chuan, "Uluk taka ka zir chian hnuah dan ang thlap a nih avangin ka hnâwl lo. Pu Duhoma insawifiahna hi MLA 12 hnenah ka pe a, ni sarih chhung chhanna hun ka pe. Chumi hnuah an duh dan angin MLA-te leh Pu Duhoma chu sawi duh an neihte sawina hun kan siamsak a ni," a ti.

Speaker sawi danin, Assembly Secretariat-in document a neihte chu - kum 2018 MLA inthlan dawna Lalduhoma'n nomination paper te, return of election leh Election Commission-in MLA thlan tlinte a notified-na gazette-te a ni. Document-ahte hian Lalduhoma chu independent a ni. 

Lalduhoma'n independent a ni tih a phat loh thu sawiin Lalrinliana chuan, "ZPM chu amah candidate-tu leh thlang tlingtu an nih avangin ZPM tana theihtawp chhuah chu a bat a nih thu a sawi. Ngun taka zirchianin Pu Duhoma hi independent MLA niin, party pakhat ZPM thil tih zawmin, thu takin a inhmang a ni. Hei hi amah pawhin a pha lo," a ti.

Lalrinliana Sailo chuan, speaker chu dan ang taka document proof leh supporting document-te hmanga rorel tur a nih thu sawiin, "Haryana MLA parukte Speaker-in a bàn ṭum khat pahnih chu political party-a awm, pali chu independent MLA an ni," a ti a; MLA parukte chu Supreme Court-a an zualko hnuah Chief Justice hoa full bench ṭhukhawmin Speaker thutlukna an pawmpui thu a sawi.

Assembly Speaker chuan, thubuai inangah chuan Supreme Court thutlukna awm tawh zúlzuia thutlukna siam tura ngaih a nih thu a sawi a, "Political party zawm tih hian, formal taka enrolment tia va zawm kher lam ni loin, independent MLA-te'n party an zawm leh zawm loh tehna tur ber chu an nihphung a ni, tiin Supreme Court-in thu­tlukna a siam a ni," a ti.

•    MNF MLA 12-te'n September 12 leh 14-ah Lalduhoma hêkna Speaker-ah an thehlut

•    Hêk a nihna chu Lalduhoma thawn a ni a, insawifiahna hun ni 14 pek a ni

•    Lalduhoma'n insawifiahna October 8-ah Speaker hnenah a thehlut

•    MNF MLA-te hnenah Lalduhoma insawifiahna pek a ni a, chhàn lêtna hun ni 7 pek an ni

•    MNF MLA-te leh Lalduhoma chu Speaker-in November 3-ah an duh sawina hun a siamsak

•    MLA aṭangin Lalduhoma bàn a nih thu Speaker-in November 27-ah a puang

No.    MLA Hming    Assembly Bial

1.    H Lalzirliana:    Mamit

2.    Lalrinsanga Ralte:    Serlui

3.    C Lalmuanpuia:    Aizawl North-III

4.    Zothantluanga:    Aizawl West-I

5.    Dr F Lalnunmawia:    Aizawl South-III

6.    L Thangmawia:    Lengteng

7.    Dr ZR Thiamsanga:    Champhai North

8.    Ramthanmawia:    East Tuipui

9.    Dr Vanlalṭanpuia:    Lunglei North

10.    H Biakzaua:    Lawngtlai East

11.    Lawmawma Tochhawng:    Lunglei East

12.    Dr K Pachhunga:    Lunglei South