KHAWTHLIR

Thisen pe
Students’ Self-Support Union (SSU), Aizawl chuan nimin khan an din champha vawi 37-na pualin Civil Hospital, Aizawl blood bank-ah thisen unit 44 an pe a, petute mipa 37 leh hmeichhia pasarih an ni. Mamawii HSS NSS pawhin nimin khan Aizawl Civil Hospital blood bank-ah thisen unit 28 an pe a, petute mipa 18 leh hmeichhia 10 an ni. May 26, Ningani khan Assam Rifles-te'n Siaha District Hospital tan thisen unit 22 an pe bawk.

Kût souvenir
Kumin Chapchar Kut souvenir, Nghilhloh Bu tih chu nimin khan chief minister Zoramthanga'n CMO conference hall-ah a tlangzarh. Nghilhloh Bu-ah hian phek 127 a awm a, thuchah leh Mizoram hmun hrang hranga Chapchar Kut lawm dan leh thlalakte dah a ni a, thuziak 13 a awm bawk.

Kamlova Chhangte Paih turin hriattir
Aizawl DC Dr Lalhriatzuali Ralte chuan nimin khan Chief Infomatics Officer hnenah lehkha thawnin, Kamlova Chhangte s/o Tlangchhuana Chhangte, Ṭhuampui, Aizawl scheduled tribe certificate pahnih, June 27, 2018 leh June 12, 2020-a pek tawhte chu titawp tur leh paih turin a hriattir. Kamlova Chhangte hi Kamrul Laskar tia hriat a ni bawk.

Leiminin naupang a chhilh hlum
May 26, Ningani chawhnu dar 2:30 vel khan Thinghlun khuaah leiminin naupang pahnih a chhilh a, naupang pakhat zawk Lalromawia (12), pawl 4 zirlai a chhilh hlum. Thu dawn danin, leimin hian Lalromawia leh Lalnunkima te a chhilh a, Lalnunkima chu chhan hman a nih laiin, Lalromawia erawh chu an chhan hman lo a ni.

Pisa kai turte dang zui zel
Lawngtlaia doctor sawn chhuahna thupek sût tur leh doctor dah belh tura sorkar phûta Central YLA bultuma Lawngtlaia sorkar pisa, zirna-in leh bank-a kal turte dan chu nimin khan an la chhunzawm zel a; sorkar aṭangin thu lawmawm dawn an la nei lo.

MCAB hawng
Cooperation minister C Lalrinsanga chuan nimin khan ITI Vengah Mizoram Cooperative Apex Bank (MCAB) branch 23-na leh ATM booth thar a hawng. ITI Venga MCAB branch thar nen hian MCAB-in Mizoramah branch 23 a nei a, Aizawl khawpuiah branch 12 leh Aizawl páwnah branch 11 a nei a ni. ATM booth 23 leh mobile van ATM pahnih a nei bawk.

MIFF-ah Mizo siam
Kumin May 29 leh June 4 inkarah Mumbai International Film Festival (MIFF) neih a ni dawn a, Mizo kutchhuak film pho chhuah a ni dawn.

Sikul tlawh
Aizawl West-III bialtu MLA VL Zaithanzama chuan nimin khan a bial chhunga sikul ṭhenkhat - Khatla South Primary School, Mission Vengthlang Primary School leh Maubawk High School-te a tlawh. Sikul building leh hmunhma dangte enpuiin, zirtirtute nen an mamawhte an sawiho a; a ṭul ang zela hmalakpui a tum thu a sawi.

Poetry Festival
Hrangbana College Literature Club chuan nimin khan an college conference hall-ah thu leh hlaa intawhkhawmna, College Poetry Festival an buatsaih a, Human Resource Development board vice chairman L Thangmawia, MLA-in a hawng. MLA hian HBC Literature Club lehkhabu siam 'Zirlaite hril-hla (Anthology of Poetry)' a tlangzarh a ni.