Textiles Minister-in Mizo thil hralhna tur Emporium Delhi-ah awm se a duh

Sorkar laipuia Textiles minister of state Darshana Jardosh chuan nimin khan Commerce & Industries minister Dr R Lalthangliana chu a pisaah tlawhin a kâwm a; Mizo kutchhuakte pho chhuaha hralhna tur emporium New Delhi-ah awm se a ṭha dawna a hriat thu a sawi.

Darshana Jardosh chuan, Mizo kutchhuak puan leh hnáng (handloom & handicraft)-te chu ṭha a tih thu leh mawi a tih thu sawiin, khawvela pho chhuah tlâk a nih thu a sawi a; Mizo kutchhuakte pho chhuaha hralhna tur emporium New Delhi-ah awm se ṭha a tih thu a sawi a ni.

Dr R Lalthangliana chuan, Darshana Jardosh chu sorkar laipui minister Mizoram tlawh tawh zingah Mizorama chám rei ber leh hmun tlawh tam ber a la nia a hriat thu a sawi a; Union Minister rawn zin chuan Mizoram tan rah ṭha tak a chhuah a beisei thu sawiin, tun hnaia Ministry of Textiles-a Mizoram mamawh project an thehluhte chu lo en zui turin a ngen a ni.

Union Minister hian May 26, Ningani tlai khan Sericulture department enkawl, Zemabawka Sericulture Training Institute a tlawh a, Sericulture minister Dr K Beichhua'n lo dawngsawngin, hmunhma an fanpui.

Darshana Jardosh chuan, Mizoramin sericulture lamah hma a sawn zel theih nan leh sericulture behchhana eizawngtute hamṭhatna turah theihtawp a chhuah tur thu a sawi.

Dr K Beichhua chuan, North East Region Textiles Promotion Scheme (NERTPS) hnuaia sericulture hmasawnna tura hma an laknain rah ṭha a chhuah a, Best Performing State nihna Mizoramin a dawn thu Jardosh a hrilh. Sericulture Training Institute tihchangtlunna tur ruahmanna sorkar laipuia an thehluh tawh chu tihpuitlinsak turin a ngen bawk.

Darshana Jardosh hian a tu leh fate a rawn hruai a, Mizoramah zan thum a riak a, vawiinah Aizawl a chhuahsan dawn a ni.