Ukilte’n Serchhip DC an dem

Ukil intêl khawmna pawl Mizoram BAR Association (MBA) chuan thuchhuah siamin, ukil rawih chungchanga April 21, 2022-a Serchhip DC hriattirna tihchhuah an dem thu an tarlang.

MBA chuan, Mizoram sorkarin dan kalha thuchhuah siamin, ram neitute zangnadawmna tur aṭanga dik lo taka cess 15% a lak avangin ram neitute lungawi loin ukil an ruai tih an tarlang a, “Gauhati High Court, Aizawl Bench-ah Mizoram sorkar an khing a, Court chuan Mizoram sorkarin 15% cess a laksak hi dan kalh a ni a, pe kîr leh nghal turin thupek a chhuah a ni,” a ti.

Thupek zûlzuiin Serchhip DC chuan April 21, 2022 khan ukilte tana thu déngkháwng tak, ‘Mipuite’n ṭul loa sum an sèn thlawn lohna turin mahni sum séng heka Court-a kal emaw, ukilte ruai lo turin kan inhriattir a ni e,’ tih a chhuah thu tarlangin MBA chuan, “Ukil profession zah loa mahni kuang lo nawr chunga Serchhip DC thuchhuah hi kan dem tak zet,” an ti a; Serchhip DC chu a thuchhuah siam ṭha turin an phût.

MBA tarlan danin, ukil rawih leh rawih loh chu mimal duh thlanna leh zalenna a ni.