Serchhip damdawi-in sa turin MoU ziak

Serchhip District Hospital tihlena khum 100 awmna tur sak thar turah nimin khan CMO Conference Hall-ah Power Grid Corporation of India aiawh, Health department aiawh leh Serchhip DC-te'n thawhhona thuthlung, Memorandum of Understanding an ziak.

MoU ziahnaah hian chief minister Zoramthanga chuan, Mizoramah hriselna lama inenkawlna ṭha leh changtlung zawk siam zel a pawimawh thu a sawi. Health minister Dr R Lalthangliana'n a hma thei ang berin damdawi-in sak ṭan a nih a beisei thu a sawi bawk.

MoU ziahna inkhawm hi chief secretary Dr Renu Sharma-i'n a kaihruai a, Serchhip DC Nazuk Kumar-i'n project chungchang a sawifiah.

Serchhip District Hospital thar tur hi PGCI chuan an corporate social responsibility sum aṭangin cheng nuai 2,100 hmangin an sa dawn a, thuneitu aṭanga sum an hmuh veleh sak tum niin, thla 24 chhunga sak zawh tura ruahman a ni.