Mizoram chhim lamah rél kawng Siam tum a ni - Railways Minister

Sorkar laipuia Railways leh Textiles changtu minister of state Darshana Jardosh chuan nimin khan Raj Bhavan-ah Governor Dr Hari Babu Kambhampati a kâwm. Railways Minister chuan, Sairang aṭangin Mizoram chhim lamah rél kawng siam tum a nih thu leh enfiah (survey) a nih tawh thu a sawi.

Inkawmnaah hian Bairabi leh Sairang inkara km. 51-a thui rél kawng siam mek chungchang an sawi dun a; North East Frontier Railways (NEFR) hotu lute leh Rail India Technical and Economic Service Limited hotu lute telin, NEFR hotute’n Bairabi-Sairang rél kawng siam mek dinhmun an sawifiah a ni.

Darshana Jardosh chuan, Mizoramin rél kawng a nei tur chu a lawmpui thu sawiin, “Rél kawng te, KMMTTP, border trade centre-te leh national highway-te hi project inthlunzawm vek a ni a, heng project-te hi hun rei lo têah a puitling vek dawn a, chutih hunah chuan Mizoram hi sumdawnna hmunpui leh sumdawnna kawtchhuah a ni dawn,” a ti.

Mizoram Governor chuan, Mizoramah rél kawng siam a ni chu lawmawm a tih thu hrilhin, Mizoram mipuiin rél kawng chhawr ṭangkai hlàn an nghahhlelh tawh thu a sawi a; kum 2023 kum tàwpa siam zawh a nih hman loh pawhin, March 2024-ah chuan zawh ngei a nih theih nan theihtawp chhuah turin Union Minister a ngen.

Hari Babu Kam-

b­hampati chuan, Mizoramah rél a luh chuan sum leh paiah Mizoram dinhmun a thlâk danglam dâwrh dawn nia sawiin, “Tunah Aizawl leh Silchar inkar kal nan mi pakhat senso Rs 1,000 chuang emaw a ni a, rél a awm hunah chuan Rs 100 velah a tla dawn a, darkar 6 chuang hun hman ngai ṭhin chu darkar 3 aia tlemah a tla thla dawn a ni,” a ti.

Inkawmnaa NEFR general manager Anshul Gupta sawi danin, Sairangah rél chawlhhmun an sa zo ṭep tawh a, rel chawlhhmun changkang tak a ni dawn; khualzinte thlenna tur hotel te, damdawi-in leh thil chi hrang hrang siam tel a ni dawn a ni.