Covid-19 vei enkawl mek mi 146 an awm

May 26, Ningani khan Mizoramah Covid-19 vei mi 29 hmuh chhuah a ni. Nimin khan hripui vei dam tawh mi 18 chhuahtir an ni a, hripui vanga thi an awm lo. Covid-19 positive enkawl mek mi 146 an awm.

Ningania hripui vei hmuh tharte chu mipa 16 leh hmeichhia 13 an ni a; TrueNAT hmanga hmuh chhuah pahnih leh RAT hmanga hmuh 27 niin, positivity rate chu 9.86% a ni.

Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a, a záwnin ni sarih chhung thi an awm tawh lo.

IDSP record angin, Mizoramah Covid-19 vei 2,28,255 hmuh chhuah a ni tawh a, mipa 1,06,276 leh hmeichhia 1,21,979 an ni a, mipa aiin hmeichhia 15,703-in an tam zawk. Nimin tlai dar 5 thleng khan mi 2,27,411 (99.63%) chhuahtir an ni tawh a, mi 698 (0.31%) thi tawhin, enkawl mek mi 146 (0.06%) an awm.

Nimin tlai dinhmun angin, Mizoramah hripui vei enkawl lai tamna ber Lunglei district-ah mi 48 an awm a, district pathum - Siaha, Lawngtlai leh Hnahthial district-ah hripui vei an awm rih lo. Champhai, Khawzawl, Serchhip leh Kolasib district-ahte mi 10 aia tlem ṭheuh an awm mek bawk.