Duhoma bân hi a mak ka tiin a pawi ka ti - Zodintluanga

Congress Legislature Party (CLP) leader Zodintluanga Ralte chuan, MNF MLA 12-in an hêk vanga ZPM Legislature Party leader Lalduhoma, MLA aṭanga bàn a ni chu mak a tih thu leh pawi a tih thu a tarlang.

Zodintluanga Ralte hian MLA aṭanga Lalduhoma bàn a nih chungchangah nimin khan thuchhuah (statement) a tichhuak a; "A mak ka tiin, a pawi ka ti hle. ZPM MLA dangte lakah pawh action la si lo a, Pu Lalduhoma lakah chauh action lâk a ni hi a mak hle a, mimal inhuatna vang liau liauah ka ngai," a ti.

ZPM MLA-te chu  ZPM hming veka campaign, Election Commission of India-a registration la nei lo an nih vanga independent-a ding an nih thu sawiin Zodintluanga chuan, "Independent MLA ni mah se, ZPM-a an tel hian anmahni vote-tute an phatsanna a awm loah kan ngai," a ti a; chuvang chuan Lalduhoma’n ZPM-a mi a lâwm lut pawh hriatthiamna thui tak an nei tih a sawi.

CLP Leader chuan, "Ram leh hnam hmasawnna leh ram tana thil ṭha zawk tur ngaihtuah vang pawh ni lo, rilru hrisel lo taka mahni MLA pui ngei inpaihthlakna a awm ta hi Mizoram political history-ah ṭha lo taka hriat reng a ni tawh dawn a ni," a ti.