Social media-a kan thu dawnte a dik leh dik loh chanchinbuah finfiah a ṭha - Robert Romawia

Haulawng, Lunglei district-a Pathiannia chhuak chanchinbu, Lawhleng Weekly Newspaper chuan May 28, Inrinni khan kum 21 tlin, nickel jubilee an lawm a, minister of state Robert Romawia Royte leh MJA General Head­quar­ters president C Lalram­buatsaiha ten an hmanpui.

Inkhawm hi Lung­lei Times editor H Lal­than­sanga'n a kaihruai a; khuallian Robert Romawia Royte chuan, Mizo mipuiin social media an khawih nasa tih sawiin, "Social media a chak tawh hle a, thu kimchang lo leh belh­chian dâwl lo, mipui rilru a dik lo lama hruai thei a darh nasa tawh em em a, ngaihdan dik lo min puttir ṭhin a, mipui kan fimkhur a, social media hman thiam kan inzir a ṭul tak zet. Chanchinbu leh TV chanchin tharah thu dik a chhuak ṭhin a, hengah hian social media-a kan thu dawnte a dik leh dik loh kan finfiah ṭhin a ṭha," a ti a, mipuiin chanchinbu chhiar an uar a ṭul thu a sawi.

Robert Romawia Royte chuan, Lawhleng chanchinbuin kum 21 a tling chu a lawmpui tak zet thu sawiin, "Kawng hrang hranga media tihmasawn turin sorkarin theihtawp a chhuah zel dawn a ni," a ti a; media mite chu thu dik ṭan a, thlei bik nei loa thu puang darh ṭhin turin leh mipui sûkthlêk siamtu leh mipui rawngbawltu pawimawh tak an ni tih hre thar turin a chah a ni.

Minister hian Lawhleng chanchinbu hnenah Rs 50,000 a pe a; Lunglei leh Siaha district MJA-te'n press club thawm ṭhatna atana an mamawh tur cheng nuai 5 ve ve an neih dan tur a siamsak dawn thu leh Haulawng khelmual leh volleyball court-te cheng nuai 30 sénga siamṭhat thuai a nih tur thu a puang bawk.

MJA president C Lalrambuatsaiha chuan, hun harsa tak paltlanga Lawhlengin kum 21 a tling chu a lawmpui thu leh Haulawng khawtlang hruaitute'n ṭha taka an ṭawiawm chu lawmawm a tih thu a sawi a; chanchinbute leh chanchinbu mite chu thu dika ding reng tura chahin, "Sorkar khalh ngíltu tur kan ni a, a ṭul hunah chuan sorkar kan sawisel ngam tur a ni a, kan fak ngam tur pawh a ni," a ti.

Lawhleng Weekly kum 21 tlin lawmnaah hian MJA Gen.Hqrs, Aizawl aṭangin member 11 telin, Lunglei district, Lawngtlai district leh Hnahthial district aṭangin an president-te hoin member ṭhahnem tak an tel a; Lunglei IPRO C Lalremruati leh a thawhpuite leh Haulawng leh a chhehvel khuaa khawtlang hruaitute an tel bawk.

Lawhleng chanchinbu hi kum 2001-ah chhuah ṭan niin, Haulawng bakah a chhehvel khuaah sem a ni a; editor chu Lalhmachhuana Ralte a ni.