Sorkar laipui Education Minister-in MZU-ah hostel leh centre a hawng

Sorkar laipuia External Affairs leh Education changtu minister of state Dr Rajkumar Ranjan Singh chuan May 28, Inrinni khan Mizoram University-a Research Scholars' Hostel leh Faculty Deve­lopment Centre a hawng a, Pachhunga University a tlawh bawk.

Dr Rajkumar Ranjan Singh chuan, MZU-in 2022 impact panking a neih phak a vangin a chhuang tih sawiin, "MZU hi India rama National Education Policy 2020 hmang hmasa pawl a ni. MZU leh Mizoram sorkarin zirna hmasawn nan ṭhahnemngai taka in thawhho avangin MZU leh Pachhunga University-in nasa takin hmasawnna a nei a ni," a ti.

University hmasawn nan sorkar laipui hmalakna chauh a tâwk loh thu sawiin Union Minister chuan, "State sorkar nena thawhona ṭha a pawimawh tel," a ti a; MZU South Campus hmalakna chungchanga harsatnate a fel thuai theih nan hma a lâkpui tur thu a sawi.

MZU vice chancellor Prof. KRS Sambasiva Rao chuan, MZU chu India rama research project hmu hnem ber pawl a nih thu sawiin, "Covid-19 pandemic chhungin cheng vbc 100 chuang hmuh a ni a, hmarchhaka university zingah project hmu tam ber a ni. Covid chhungin MZU chuan webinar, seminar leh meeting 700 chuang a buatsaih thei a, India ramah pawh research paper tichhuak hnem ber leh ṭha ber pawl a ni," a ti.

Reseach Scolars Hostel hi North Eastern Council aṭanga sum hmuh nuai 590 hmanga sak a ni a, kum 2016-ah sak ṭan niin, implementation agency chu Manipur Tribal Development Corporation a ni.

Faculty Development Centre chu Ministry of Education hnuaiah Pradan Madan Mohan Malviya National Mission on Teachers and Teaching kaltlangin cheng nuai 314 hmanga sak a ni a, July 2019-ah sak ṭan niin, December 2021-ah sak zawh a ni.

Education Minister hian Inrinni zing khan PUC a tlawh a, PUC teaching faculty, non-teaching staff leh zirlai hruaitute'n an lo hmuak a, campus-ah thing a phun. Minister hi a nupui Ch. Debala Devi leh Mizoram Lok Shaba MP C Lalrosanga ten an ṭawiawm a ni.

Dr Rajkumar Ranjan Singh chuan, PUC chu NAAC accre­ditation A+ ni mek an nih avangin a aia dinhmun sang zawka ding thei tura ṭan lâk a ṭul thu a sawi a; academic mai ni lo, physical infrastructure lama PUC hmasawnna chu ropui a tih thu a sawi bawk.