MSCI-ah cancer hemna khawl thar hawng

Health & Family Welfare minister Dr R Lalthangliana chuan May 28, Inrinni khan Mizoram State Cancer Institute (MSCI)-ah cancer hemna khawl thar brachytherapy machine a hawng.

Minister chuan, JICA-in Zemabawka Cancer Superspeciality Hospital sakna tura sum ruahman cheng vbc. 500 chu vbc. 660-ah tihsan a nih thu leh kum 2028-ah sak zawh tum a nih thu a sawi.

Dr R Lalthangliana chuan, Mizo-ramah cancer vei an tam avangin kawng tinrenga ṭan lâk a ngaih thu sawiin, "Hman ni lawka cancer hemna khawl changkang tak linear accelerator hman theih tura hawn leh tuna brachytherapy machine thar hian MSCI a tichangtlung hle dawn," a ti a; cancer laka inveng turin ei leh in uluk leh fimkhur te, zûk leh hmuama fihlim leh taksa insawizawi a pawimawh thu a sawi.

Japan International Agency Cooperation (JICA) ṭanpuina leh an sum pûk hmanga cancer veite enkawlna tur Cancer Superspeciality Hospital din turah sorkar laipui phalna leh a kaihhnawih tihfel ngaite chinfel a nih tawh thu sawiin Minister chuan, "Tunah chuan JICA leh Mizoram sorkar inkar a ni tawh. JICA lamin an sawi dan chuan he damdawi-in hi kum 2028-ah sak zawh hman an beisei a, a tira sum ruahman vbc. 500 chu tisangin vbc 660 a ni tawh," a ti.

Health & Family Welfare Board vice chairman Dr ZR Thiamsanga, MLA pawhin thu sawiin, cancer veite hma taka hriat chhuah an nih theih nan cancer screening zau taka kalpui a ṭul thu a sawi. Khawl hawnna inkhawmah hian Health secretary R Lalramnghaka, MSCI director Dr Zoramthanga leh radiation oncologist Dr Lalhlupuii te pawhin thu an sawi bawk.

Brachytherapy khawl hi cheng nuai 302 man a ni a, Varian Medical Systems, USA siam a ni. MSCI-ah hian company dang siam channel pathum awmna brachytherapy khawl hman a ni tawh ṭhin a, tuna khawl thar hawn tak chu channel 24 nei a ni.