Mizo ṭawng 'artificial intelligence' hmangin thuam a ni dawn - Union Minister

Sorkar laipuia Exter­nal Affairs leh Education minister Dr Rajkumar Ranjan Singh chuan, Mizo ṭawng hrethiam lote pawhin an hriatthiam theih nan 'artificial intelligence' hmangin thuam ṭhat a ni dawn tih a sawi.

Dr Rajkumar Ranjan Singh hian May 27, 2022-a Mizoram BJP pisa a tlawhnaah thu sawiin, "New Education Policy 2020-in a tum chu mahni hnam ṭawng humhalha tihhmasawn a ni. Mizo ṭawnga kan thusawite Mizo ṭawng hrethiam lote'n an hriatthiam ve theih nan 'artificial intelligence' hmangin thuam ṭhat a ni dawn. Tunlai digital khawvel thiamna nen zirna kalpui a ni dawn a, vocational training neih chhoh tum a ni," a ti.

Education Minister chuan, sorkar laipui hnuaia awm Kendriya Vidyalaya leh Jawahar Navodaya Vidyalaya-te chu district tina awm tur a nih thu leh Kendriya Vidyalaya building sak zawh lohte chu sak puitlin a nih thuai theih nan hmalak a ṭul thu a sawi.

Mizoram University tihchangtlun lehzual a ngai tih sawiin Dr Rajkumar chuan, "Myanmar-a kan unaute leh India ram state dang aṭanga zirlai tam zawk kan neih theih nan MZU leh zirna hrang hrangte tihhmasawn a ngai a, chutianga kan tihhmasawn chuan Mizoramin zirna mai bakah economy-ah hmasawnna tam tak a neih phah dawn a ni," a ti.

External Affairs Minister chuan, hmarchhak state-a tualchhung thil siam chhuahte ram páwn thlenga thawn chhuak turin hmalak mek a ni tih sawiin, "Hmarchhak state hrang hrang chief minister leh chief secretary ṭheuhte kâwmin, tualchhung thar chhuah leh siam chhuahte ram páwna tam zawk thawn chhuak thei tura hmalakpui turin ka ngen dawn," a ti a; Manipur mi a nih angin, a hmarchhakpuite tan theihtawp chhuah a inhuam reng thu a sawi bawk.