KHAWTHLIR

Thisen pe
May 28, Inrinni khan Salvation Army, Central North Division chuan Civil Hospital, Aizawl tan thisen unit 102 an pe a, petute mipa 88 leh hmeichhia 14 an ni; May 21 khan unit 108 an pe tawh bawk. Inrinni vek khan Aibawk Branch YMA-in ZMC tan thisen unit 73 an pe a, petute mipa 63 leh hmeichhia 10 an ni. Sairang Bial KṬP-in Synod Hospital-ah unit 47 pein, petute mipa 42 leh hmeichhia panga an ni a; KṬP, Lunglei Bazar Veng pawhin Lunglei Civil Hospital-ah unit 22 an pe a, petute mipa 18 leh hmeichhia pali an ni.

RIPANS tlawh
Health minister Dr R Lalthangliana chuan May 28, Inrinni khan RIPANS a tlawh a, RIPANS tihchangtlunna tur project cheng vbc. 481 hmanga in hrang hrang sak mek a tlawh. Project hnuaiah hian khum 100 awmna damdawi-in, post graduate course pasarih hawnna tur in leh mamawh hrang hrang te, mi 1,000 len theihna auditorium leh guest house-te sak mek a ni.

Nupui sawisa hlum
Nimin tlai dar 3 vel khan Rosangzuali (28), Serchhip Dinthar Veng chu a pasal Zobiaksanga (35)-in an inah a sawisak avangin a thi nia hriat a ni a, police-in an chhui zui mek. Thudawn danin, Zobiaksanga te nupa thâwm hi an in chunga awm Zobiaksanga ute'n an hria a, police an thlen chuan Rosangzuali chu khum pindan chhuatah thia hmuh a ni. Zobiaksanga hi nimin tlai khan police-in an man nghal a ni.

Heroin man
Champhai Police leh CID Crime-a Special Narcotics PS Team chuan May 28, Inrinni zan khan heroin an man. Champhai police-te chuan New Champhaiah heroin gram 26 leh a kawltu Chindeihluni (31) d/o Thangkhanthuam, Bulfek, Myanmar an man a, international market-ah cheng nuai 13 man a ni. Special Narcotics PS team pawhin heroin grams 25.32 leh a kawltu Lalnuntluangi (38) w/o F Lalthlamuana, Hunthar Veng, Aizawl an man bawk a, cheng nuai 13 man a ni.