Speaker thutlukna hi politics-a Phuba lâkna a ni - Lalduhoma

MLA aṭanga bàn tak Lalduhoma, Serchhip biala thlan tlin chuan, a chung­changa Assembly speaker Lalrinliana Sailo thutlukna chu dan hmanga rorelna ni loin, politics-a phuba lakna a nih thu a sawi a, "Kan kal zel dan tur chu kan party hruaitute'n an rél ang," a ti.

MLA aṭanga bàn a nih hnua thuthar thehdarhtute'n an kawmnaah Lalduhoma chuan, MNF-te'n hnawk an tih thu sawiin, "Speaker thutlukna hi dan hmanga rorelna a ni lo a, politics-a phuba lakna a ni. Min thlang tlingtu mipuite'n 'Min phatsan lo' an tih laiin, a thlang tlingtu mipuite a phatsan tiin dâwt hmangin min bàn a ni. Speaker chungah lungawi lohna ka nei lo a, kan party mite pawh mawhpuh lo turin ka duh," a ti a; party pressure zo loin Speaker-in thu dik a dinpui ngam lo tih a sawi.

Lalduhoma chuan, Speaker chu security an pêk belha a hriat thu sawiin, "Speaker hi security pek belh a ngai lo, eng mah kan ti lo ang. Kalphung thar hmanga kal kan ni a, buaina leh tharum kan duh ve lo. Dam takin ka tuar. Min duhsaktute leh ZPM member zawng zawngte buaina siam lam ngaihtuah lo a, rilru ṭawngṭaina nena hmachhawn mai turin ka sáwm. Mipui hnenah kan thlen ang a, mipui court-in a rél mai tur a ni. MNF hi an thangkamah ngei an âwk mek a, ZPM min campaign sak a ni," a ti.

Speaker-in independent a nih pawmah a puh thu sawiin Duhoma chuan, "Ziak leh ṭawngkain vawi khat mah independent tak tak ka nih thu ka sawi lo. Val Upa Council-in ziak leh ṭawngkain ZPM-a rinawm turin min intiamtir a, min thlang tlingtu ZPM-ah vawiin thlengin ka la awm a, ka awm zel dawn. ZPM candidate 38-te khan symbol, manifesto, flag, etc. inang hmangin candidate kan ni a, independent tak takin hetiang hi an hmang ngai lo," a ti a; Speaker bulah independent a nih lohzia hlîr a sawi zawk thu a sawi.

Lalduhoma chuan, Anti Defection Law chu mahni thlang tlingtu phatsana party dang zawm santute hremna dan a nih thu sawiin, "Speaker-in a thutlukna behchhan atana a hman Supreme Court ruling leh ka dinhmun a inang lo. Supreme Court-in Haryana MLA a bàn tak pahnih chu political party candidate an ni a, palite chu independent member dik tak an ni a, Indian National Congress an zawm. Independent tak tak leh ECI-a registration la tihfel loh vanga independent-a ding a inang thei lo," a ti.

ECI-a registration a la fel hman loh vang chauha independent-a MLA atana thlan tlinte laka court case a awm a la hriat loh thu sawiin Lalduhoma chuan, "Min hêktu MLA 12 leh Speaker pawh hian an hriat ka ring lo. Party din tharte hi registration an neih hma chuan independent-in an ding ṭhin. MNF ngei pawh inthlan an chuh tirhin independent-in an ding a, independent tak tak ni lo MNF an ni tih kan hria a, tuma'n an hêk lo," a ti a, MNF MLA-te chuan an tih hnu ang ti ve an hêk thu a sawi.

Lalduhoma chuan, ZPM chu a tìr aṭangin ṭang ruala awm khawm mai mai tum an nih loh thu sawiin, "Chutiang ni ila ECI-a registration hmuh a har teh lul nen, kan party kan surrender phal lo ang. Kalphung thar mipui sorkar din tum vangin kan ṭangho a ni," a ti.

Remna leh muanna a awm theihna atan prime minister Indira Gandhi ngenna angin hna a bànsan thu sawiin Duhoma chuan, "Kan CM hi eng vangin nge tunah mi mut anga a mut a, chaw a ei theih. Chumi atan chuan kan chhungkuain kum tam tak kan retheih phah a ni. Rúl, khawvâwtin a hmeh hlum ṭêpin meiluma pho lumtu a chuk angin, Arakan khawvâwtin a hmeh hlum mai tur meiluma photu min chuk lêt a ni," a ti a; MNF-in a chunga thil an tih duh dan chuan ZPM a chawi sàn thu a sawi.

Serchhip bial mipui a lainat thu sawiin, "Ka kut, ka ká leh ka kè bàn a ni ve lo a, Serchhip bial mipui tan ka hmang zel dawn. Pathian leh bial mipui zarah Serchhip bial hi kan enkawlho leh ngei i beisei ang u. Sechhip bial mipui tan ka ding zel ang," a ti.

Zawhna chhangin Lalduhoma chuan, a kal zel dan tur chu an party hruaitute'n an ngaihtuah tur thu a sawi a, "Court-a kal chu a rei deuh dawn an ti dawn nge ka hre lo. Chutih rualin, kan ukilte chuan court-a kal an châk khawp mai. A rei lo zawngin, Serchhip bial mipui court-ah chinfel vat law law turin thutlukna an siam zawk dawn nge, ka la hre bik lo," tiin a sawi.

•    Min thlang tlingtu mipuite'n 'Min phatsan lo' an tih laiin, 'A thlang tlingtu mipui a phatsan' tiin dâwt hmangin min bân a ni.

•    Speaker chungah lungawi lohna ka nei lo, politics pressure a zo lo a ni.

•    Min duhsaktute leh ZPM member zawng zawngte buaina siam lam ngaihtuah lo a, rilru ṭawngṭaina nena hmachhawn mai turin ka sáwm.

•    Ziak leh ṭawngkain vawi khat mah independent tak tak ka nih thu ka sawi lo.

•    Haryana MLA-te leh ka dinhmun a inang lo.

•    ECI-a registration la neih loh vang chauha independent-a dingte laka court case an awm, Speaker leh an MLA 12-te pawhin an hriat ka ring lo.

•    MNF pawh inthlan an chuh tirhin independent-in an ding, MNF an ni tih a chian avangin hêk an ni lo.

•    Ka kut, ka ká leh ka kète bàn a ni ve lo a, Serchhip bial mipui tan ka hmang zel dawn.