Congress party-in Bazarpuia eizawngte thlavâng hauh

Aizawl New Market in pui ber sak chhunzawm mai loh chungchangah Congress party-te chuan May 28, Inrinni zing khan a hmunah kalin Bazarpuia eizawngte thlavâng hauhna hun an hmang.

New Market-a eizawng mi 2,000 velte thlavang hauhna hunah hian Congress sorkar laia Trade & Commerce minister H Rohluna, MPCC general secretary chuan thu sawiin, Bazarpui chei ṭhat hna chu Congress sorkar laia bul ṭan a ni tih sawiin, "MNF a sorkar hnuah chhunzawm mai loin kum khat leh a chanve chhung pawisa awm sa hman nghal mai theih an hmang phal lo a, chhungkaw 2,000 chuangte eizawnna ngaihtuah miah loin, vawiin thlenga an ngaihthah hi a pawi tak zet a ni," a ti.

H Rohluna chuan, "MNF sorkar hian Bazarpuia eizawngte a ngaihthah em avangin chhungkaw tam tak economy a tichhia a, pawisa a awm rih lo ti ṭhin mahse Kamrula te tan chuan an nei reng tho a ni tih hretu tan chuan an ngaih pawimawh záwng a nih loh vang mai a ni tih a chiang em em," a ti a; Congress party a sorkar leh a nih chuan Bazarpui chu an ngai pawimawh dawn tih a sawi.

New Market-a eizawngte thlavâng hauhna inkhawmah hian MPCC general secretary TT Zothansanga leh secretary Rosiamngheta te pawhin thu an sawi a ni.