Kuminah sikul hawng tawh dawn lo January 15, 2021-ah sikul ṭan tum
School Education minister Lalchhandama Ralte hoa a pisaa nimina department hotute ṭhukhawm chuan, kumin 2020 chhung chuan sikul hawn tawh rih loh an rél. Sikul luh hun atan January 15, 2021 tinzâwn a ni.
Minister hoa ṭhutkhawmah hian Mizorama sikul hawn dan tur te, syllabus chungchang leh exam kalpui dan turte an sawiho. "Thlasikah hri léng a zual hlauhthawnna a awm avangin kumin 2020 chhung chuan sikul hawn tawh rih loh ni se," an ti.
Sikul luh hun atan January 15, 2021 an tinzâwn a, hei erawh hi chu State Executive Committee-ah thlir zui leh a ni ang. Online class neih ṭhin chu December 18, 2020 thleng neih turin an rél a, December 19 aṭanga nakkum January 4 chhung châwlin, January 5-14, 2021 chhungin online class chhunzawm leh tura ruahman a ni.
Hostel-a awm mek zirlai naupangte chu December 11, 2020 ral hmain hostel aṭanga chhuahtir vek ni se, an ti a; hostel-a luh leh hun tur chungchangah hostel neitute chu sorkar thuchhuak ngaichâng turin an chah.
Meeting-a tarlan danin, sikul kal theih a nih loh avangin syllabus hman mek chu India ram puma kalpui angin 30%-a tihtlem a ni a, zirtirtute pawh zirlai paih ṭhen tur leh an zir tur chin hriattir an ni tawh. Board exam turte an inbuatsaih thiam theih nan CBSE-in a tih angin, MBSE chu model sample question siam turin an ruat a; HSLC leh HSSLC exam hun atan April 2021 an ruat bawk.
Pawl 1-8 zirlaite tan bridge course buatsaih ni se, an ti a, SCERT siam turah an dah. Pawl 9 leh 11 zirlaite exam dan tur chu MBSE ruahman turah an dah a, naupangin an thiam ngei ngei tura pawimawh zualte hmaih lo tura inruahman ni se, an ti.
Ṭhutkhawmah hian Human Resource Development Board vice chairman L Thangmawia, School Education secretary Esther Lalruatkimi, MBSE, SCERT leh department hotute an tel a ni.