Ramria insumdawn tawnna ngai pawimawh turin MEA Minister ngen

External Affairs leh Education changtu minister of state Dr Rajkumar Ranjan Singh pualin Higher & Technical Education minister Dr R Lalthangliana chuan May 27, Zirtawpni zan khan Hotel Floria-ah zanriah a buatsaih. R Lalthangliana chuan, Bangladesh nena ramria insumdawn tawnna leh Mizoram University Southern Campus dinna turah theihtawp chhuahpui turin a ngen.

Dr R Lalthangliana chuan, April 2022-a Mizorama Bangladesh Commerce minister Tipu Munshi a zin ṭuma ramria sumdawnna kalpui theihna atana pawimawh tih hmasak ngai chungchanga thuchhuah inṭâwm an siam chu Union Minister a hrilh a; India sorkarin tih tur a neihte chu Ministry of External Affairs chan a nih avangin ngai pawimawhsak tur leh tihhlawhtlinsak turin a ngen a ni.

HTE Minister chuan, Lungleia MZU Southern Campus din turin Ministry of Education-in a thuphungin phalna pe mah se, sum ruahman a nih loh avangin MZU-in hma an lak theih loh thu sawiin, theihtawp chhuahpui turin Education minister Dr Rajkumar a ngen a; RUSA chungchang a sawipui bawk.

Dr Rajkumar Ranjan Singh chuan, Dr R Lalthangliana ngennate chu a lo en tur thu a hrilh a; sorkar laipuiin New Education Policy, 2020 hmangin zirna-in sang zawk leh zirna sang zawkte tihchangtlun a tum thu sawiin, "National Higher Education Commission kaltlangin thil tam tak ruahman mek a ni," a ti.

External Affairs leh Education Minister hi May 27, 2022 khan a rawn thleng a, a tuk May 28 khan Mizoram a chhuahsan a ni.