Ram hmasawnna tak tak atan sorkar inrelbawlna ṭha a ngai - ZPM Consultant

ZPM consultant F Rodingliana chuan, ram hmasawnna tak tak awm tur chuan sorkar inrelbawlna ṭha a awm a ngai nia sawiin, "Hemi kawngah kan ṭhalaite pawh tunah chuan kan harh ṭan ta viau niin ka hria a, a lawmawm," a ti.

Tunhnaia Lengteng GSA buatsaih volleyball tournament a khuhhawnnaah thu sawiin F Rodingliana chuan, "Mi tam takin politics kan sawi hian kan beng kan ti thlep nghal mai ṭhin hi a pawi. Ram hian hruaitu ṭha a mamawh a, hruaitu ṭha lo chhuak tur chuan vawiin nia kohhran leh tlawmngai pawl hrang hrang mai bakah khawtlang parawnte hian politics hi kan ngaihven em em tur a ni," a ti a, party politics ruihchilhna ni lo, ram inrelbawlna politics chu ram hmasawnna tur ber a nih avangin a pawimawh thu a sawi.

ZPM Consultant chuan tun laiah mi tam tak eizawnna pawh hi politics a innghat nia a hriat thu sawiin, "Lei lung nena inzawm eizawnna kan kalpui a ngai. Hemi tur hian kan sorkar pawh a ṭhan harh a ngai hle a ni. Kan ṭhalai zingah zu leh ruihhlo bawiha tang kan la tam em em a, hei hi buaipui tham pawh a tling a ni. Ruihhlo dona atan te, kan rilru leh taksa ti chak a, a lo hrisel zawk na'n infiamna pawh kan uar deuh deuh a pawimawh," a ti.