Grape wine man PC leh BJP-in an dem

Peoples' Conference party leh BJP Mizoram Pradesh Ṭhalai chuan thuchhuah siamin, Mizoram sorkarin Mizorama grape wine siamte an man chu an dem thu leh kut hnathawktute rahbehnaa an ngaih thu an tarlang.

PC party chuan, Mizoram Liquor Prohibition (MLP) Rules tlawhchhana Champhai leh Hnahlana kut hnathawktute grape wine siam chhuah cheng nuai tam tak man zahngaihna nei loa Mizoram sorkarin a tirîral chu khua leh tuite chunga zahngaihna sorkarin a neih lohzia tichiangtua an ngaih thu leh an dem tak zet thu an sawi.

Hripui avangin Mizoram mipui, a bikin kut hnathawktute dinhmun a ṭha lo hle tih sawiin PC party chuan, "Kut hnathawktute chunga Excise Minister hmalakna hi a hun lo kan ti hle a, chem loa lu lâkna tak zetah kan ngai. Kut hnathawktute eizawnna cheng nuai tam tak man tihrîrala awm mek hi a rang thei ang bera hnûk kîr turin Mizoram sorkar kan phût a ni," an ti.

Mizoram BJP Ṭhalai chuan, Excise & Narcotics department-in Mizoram siam grape wine an man chu mak an tih thu sawiin, grape chínga eizawngtute hmakhua a thim hlea an ngaih thu an tarlang a, "Kut hnathawktute rahbehna lian tak a nih bakah, harsatna lian tak an siam hi a pawi kan ti hle," tiin, kut hnathawktute harsatna sutkianna tur a rang lama ngaihtuahsak turin sorkar an ngen.

BJP ṭhalaite chuan, CM Zoramthanga'n an sorkar hunah vai buh an rin tawh dawn loh thu a sawi tih tarlangin, "Tunah CM term tàwp dawnah pawh thil thleng thei lo tur a nihzia chiang takin a lang. Thingtlang mite eizawnna rapbet záwng leh tiṭhuanawp záwnga MNF kaihhruai sorkar a kal hi a mak kan ti a, mahni hlâwkna chauh ûm an ni tih hi an chêt dan hian a tichiang hle," an ti.