A zawnin ni 9 chhung hripui vei thi an awm lo

Mizoramah Covid-19 vei May 27, Zirtawpni khan mi 14 leh May 28, Inrinni khan mi 22 hmuh chhuah a ni. Nimin leh Inrinni khan hripui vei dam tawh mi 28 chhuahtir an ni a, hripui vanga thi an awm lo. Covid-19 vanga thi a zawnin ni kaw chhung an awm tawh lo.

May 27, Zirtawpnia hripui vei hmuh tharte chu mipa pasarih leh hmeichhia pasarih an ni a; ZMC laboratory-a hmuh chhuah pakhat leh RAT hmanga hmuh 13 niin, positivity rate chu 4.22% chiah a ni.

Inrinnia Covid-19 positive hmuh tharte chu mipa pasarih leh hmeichhia 15 an ni a; RAT hmanga hmuh chhuah 21 leh FIA hmanga hmuh pakhat niin, positivity rate 10% a ni. RT-PCR leh TrueNAT hmangin swab sample endik a ni lo.

Nimin khan hripui vei zinga dam tawh mi 13 chhuahtir an ni a, May 28, Inrinni khan mi 15 chhuahtir an ni bawk. Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a, a záwnin ni kaw chhung thi an awm tawh lo.

IDSP record angin, Mizoramah Covid-19 vei 2,28,291 hmuh chhuah a ni tawh a, mipa 1,06,290 leh hmeichhia 1,22,001 an ni a, mipa aiin hmeichhia 15,711-in an tam zawk. Nimin tlai dar 5 thleng khan mi 2,27,439 (99.63%) chhuahtir an ni tawh a, mi 698 (0.31%) thi tawhin, enkawl mek mi 154 (0.06%) an awm.

Nimin tlai dinhmun angin, Mizoramah hripui vei enkawl lai tamna ber Lunglei district-ah mi 52 an awm a, district pathum - Siaha, Lawngtlai leh Hnahthial district-ah hripui vei an awm rih lo.