Online shopping aṭangin Entry tax lak a la ni lo

Mizoram sorkar chuan chhan hrang hrang avangin online shopping aṭangin entry tax a la la thei lo a, tun dinhmunah chuan lak theih mai a la beisei awm hrih lo.

Vanglaini palai zawhna chhanga Taxation department hotute'n an sawi danin, Cabinet meeting hnuhnung berin a pawm tâk, 'Amendment Proposal for Addition of Taxable Items Under the Mizoram Entry Tax Act, 2015' chu online shopping aṭanga thil lei tlángláwnte aṭanga entry tax lak theihna tur atana ruahman a ni.

Entry tax lak theihna tura ruahman tharte chu - ready made garment, pheikhawk, electronic bungrua, sana, bag, kawnghren, wallet, tarmit chi hrang hrang leh cosmetics-te an ni. Heng item aṭang hian entry tax 4% lak tura tih a ni.

Taxation department hotute chuan, online shopping aṭang hian chhiah lak turin ruahmanna awm mah se, tun dinhmunah chuan an la lak theih loh thu an sawi a, "Online shopping aṭanga entry tax la turin kan la inpeih rih lo. Software hran bakah, thil tihdanglam ngai dangte a la awm a, tun dinhmunah chu lak mai theih a beisei awm lo," a ti.

Online shopping aṭangin chhiah lak theih la ni lo mah se, Amendment Proposal for Addition of Taxable Items under the Mizoram Entry Tax Act, 2015' chu hman a nih dawn tho tih sawiin Taxation department hotute chuan, "Notification chhuah a nih velah hman ṭan a ni ang," a ti a; chhiah lak tharna tur item hrang hrangte chu online aṭang lo pawha Mizorama lak luh reng a nih tho thu an sawi.

Hetihlai hian Taxation dept. chuan kumin sorkar kum 2016-2017 chhung atana an target an khum tawh. Kum 2016-2017 chhung an target chu budget estimate-ah cheng nuai 250 niin, revised estimate-ah cheng nuai 270 a ni a, January, 2017 thleng khan cheng vbc. 2 chuangin an khum tawh.