Vawiinah Chapchar Kût lawm a ni dawn

Vawiin hi Mizo kut ropui bera ngaih, Chapchar Kût a ni a, Mizoram hmun hrang hrangah lawm a ni dawn a; mi zawng zawng tel tura sawm an ni.

Aizawlah chuan Chapchar Kut hi Mizoram sorkar leh Central YMA bultumin Lammualah hman a ni dawn a, Art & Culture minister R Romawia chu kût thlengtu a ni ang. Chief minister Lal Thanhawla kût pa a ni ang a, Myanmar-a Chin state chief minister Salai Lian Luai chu khuallian a ni ang.

Aizawla Chapchar Kûtah hian Mizo hnam lam leh zai chi hrang hrang entir a ni dawn a, mimal leh pawl/group zaithiamte an zai dawn bakah, tlaiah chhâwnghnawh a ni dawn. Kûtah hian Central YMA sàwmna angin Tahan, Myanmar-a Mizo eng emaw zat pawhin an rawn hmang dawn a, March 1, 2017 khan Tahan chhuahsanin Mizoram an rawn pan a ni.

Chapchar Kût hi dis­trict khawpui hrang hrangah leh khaw dangah­te pawh hman a ni dawn a, sorkar mi pawimawhte'n an hmanpui ang. Hetih lai hian, Serchhipah erawh chuan Presbyterian Kohhran Hmeichhe Inkhawmpui Lian an thlen dawn avangin an hmang dawn rih lo thung.