COVID-19: Mizoram dinhmun Hripui vei mi 23 hmuh belh a ni

November 26, Ningani khan Mizoramah Covid-19 vei mi 23 hmuh chhuah a ni a, Lawngtlai district-a hmuh chhuah tam berin, pakua an ni. Nimin khan hripui laka fihlîm tawh mi 15 chhuahtir an ni thung.

Covid-19 vei hmuh tharte chu mipa 10 leh hmeichhia 13 an ni a; ZMC laboratory-a hmuh mi pahnih, TrueNAT-PCR hmanga hmuh mi pasarih leh Rapid Antigen Test (RAT) hmanga hmuh mi 14 an ni.

Nimin khan hripui laka fihlim tawh mi 15 chhuahtir an ni a; Aizawl leh Serchhip district-ah pakhat ve ve, Lunglei district-ah pahnih, Lawngtlai district-ah pariat leh Mamit district-ah pathum an chhuak.

Mizoramah Covid-19 positive mi 3,788 hmuh chhuah a ni tawh a, mipa 2,794 leh hmeichhia 994 an ni. Nimin tlai dar 5 thleng khan mi 3,367 (88.89%) chhuahtir an ni tawh a, mi panga (0.13%) thi tawhin, enkawl mek mi 416 (10.98%) an awm.

Covid-19 positive hmuh tawh mi 3,765 zinga mi 1,766 chu Mizoram chhunga kái an ni a, mi 2,022 chu state páwn aṭanga rawn lût an ni.

Hripui vei hmuh chhuah thar mi 23 zinga 16 chu Mizoram chhunga kái an ni a, mi 16 zingah hri kai ṭanna hriat loh pahnih leh natna (symptom) lang chhuak pathum an awm. Bihar Assembly inthlana duty zo rawn haw mi pali an awm bawk.

November 26 khan Mizo­ramah swab sample 1,367 endik a ni a, chu'ng aṭang chuan Covid-19 positive mi 23 an hmu chhuak. Swab sample endik dan chu - ZMC laboratory-ah mi 365, TrueNAT-PCR hmangin district pariatah mi 234 leh RAT hmangin district 10-ah mi 768 an ni.

Sorkar thuchhuah tarlan danin, ZMC laboratory-a RT-PCR hmanga hmuh chhuah pahnihte chu - hmeichhia ve ve an ni. Pakhat chu Mizoram chhunga kái a ni a; pakhat zawk, Mission Venga kum 54 mi chu tun hnaia West Bengal aṭanga rawn haw a ni a, Covid-19 symptom a nei.

TrueNAT-PCR hmangin Lunglei, Champhai leh Kolasib district hospital-ahte hripui vei hmuh chhuah a ni a, mipa pali leh hmeichhia pathum an ni. Nautê kum 2 mi, naupang kum 6, 12 leh 14 mi an tel a, mi dang zawng puitling an ni. Mi pasarih zinga pali chu tualchhunga kái niin, pathum chu state páwn aṭanga rawn haw an ni a; Bihar inthlana duty zo rawn haw pahnih an tel.

Bihar Assembly inthlana duty-te chu - Kawnpui khuaa police mipa kum 47 mi leh Zanlawn khuaa police mipa kum 31 mite an ni a; an pahnih hian quarantine facility-a awm lai ve ve niin, symptom an nei lo. State páwn aṭanga haw pakhat dang chu Tlabunga hmeichhia kum 30 mi, Silchar aṭanga haw, symptom nei lo a ni.

RAT hmangin Aizawl, Lunglei, Serchhip leh Lawngtlaiahte Covid-19 positive 14 hmuh chhuah a ni a, mipa paruk leh hmeichhia pariat niin, an zingah kum 18 aia naupang paruk an tel. Mi 11 chu tualchhunga kái an ni a, mi pathum chu state páwn aṭanga rawn lut an ni thung.

State páwn aṭanga rawn lut zinga pahnih chu Bihar inthlana duty zo rawn haw an ni a; Lunglei Luangmuala 2nd MAP-a awm mipa kum 34 leh 36 niin, symptom an nei lo. State páwn aṭanga rawn lut pakhat dang chu Chhingchhipa Prem Kram company hnuaia thawk mipa kum 35, symptom nei 

lo a ni.