Synod Social Front-in Political Education Campaign a kalpui ṭan

Synod Social Front chuan, Mizorama Political Education Campaign an kalpui tur chu nimin khan Vanapa Hall-ah hawnna inkhawm an buatsaih a, Synod moderator Rev. Lalzuithanga'n a hawng.

Political Education Campaign hawnna in­khawm hi Synod execu­tive secretary (Social Front) Rev. B Sangthanga'n a kaihruai a, Synod Mode­rator-in thuchah a sawi.

Chawhnu lamah Sy­nod Social Front commi­ttee member Lalzui­tluanga kaihruaiin hun hman leh a ni a; Revd Chuauṭhuama'n thupui 'Ram rorelnaa sorkar leh mipui mawhphurhna' tih paper a buatsaih a chhiar a, sawiho nghal a ni. Campaign hawnnaa tel tur hian Aizawla pastor/minister leh probationary pastor-te leh kohhran tin aiawh mi pahnih zel sàwm an ni.

Synod moderator Rev. Lalzuithanga chuan, Political Education Campaign chu kumin leh nakkum chhungin district khawpui hrang hrang bakah, pastor bial leh tualchhung kohhran hrang hrangah neih a ni dawn tih a sawi.

Rev. Lalzuithanga chuan, kum 2018-a Mizo­ram Assembly inthlanpui atana inbuatsaihna a nih thu sawiin, Synod Social Front-in a remchan dan angin campaign a neih ṭhin dawn thu a sawi a; campaign neihna atan Synod budget-ah cheng eng emaw zat dah a nih thu a sawi bawk.