World Hearing Day hman a ni

National Programme for Prevention and Con­trol of Deafness (NPPCD) bultumin, nimin khan IPR directorate auditorium-ah Mizorama a vawi khat nan 'World Hearing Day' hman a ni a, Health principal director Dr K Ropari khuallian a ni.

World Hearing Day puala inkhawm Hos­pi­tal & Medical Edu­cation director Dr K Lalbiakzuala'n a kaihruai a; K Ropari chuan, NPPCD vangin Mizoram­ah bengngawng mai thei dinhmuna dingte hriat chhuah an nih thu leh enkawlna leh chhawmdawl mumal zawka kalpui a nih thu a sawi a, Mizoramah beng hriatna lama harsatna neite kim zawka la inkhawrh chhuah theih ngei a beisei thu a sawi bawk.

NPPCD state nodal officer Dr Eric Zomawia'n Mizorama NPPCD kalpui dan te, hmalak mekna leh hmachhawpte a sawi a; Aizawl Civil Hospital-a audio­logist & speech patho­logist Lalrinfeli'n bengngawnna awm dan leh enkawl dante a sawi thung.

Lalrinfeli sawi danin, khawvel pumah mi nuai 3600 velin beng lamah harsatna an neia chhût a ni a; mi sang khat zela pangate chu bengngawng sa emaw, beng hriatna chak lo leh chiang loa pianga ngaih an ni.

Kum 65 chin chung lam mi pathum zinga pakhat zelin beng lamah harsatna an neia chhût a ni bawk.

NPPCD hi Mizoramah kum 2014-ah kalpui a ni a, district pasarihah invenna, enkawlna leh bengngawng dap chhuah hna kalpui mek a ni. Kum 2015-16 chhung khan beng ṭha lo mi 2,281 hmuh chhuah an ni.

World Hearing Day hi World Health Organi­sation-in March 3-a hman turin a rel a, kum 10 kal ta khan China ramah chuan hman ṭan a ni tawh. Kumina thupui chu 'Action for hearing loss, make a sound investment' tih a ni.