Mizoram Agro & Allied Products lakah MZP-in FIR an thehlut

Mizoram Agro & Allied Products, Luangmual-in zirna an kalpui danah thil fel lo tam tak awma an hriat vang leh, zirlaite'n an zir tur an zir loh tam tak a awm avang­in MZP chuan nimin khan Zonuam Police Outpost-ah an general secretary L Ramdinliana Renthlei hmingin first information report (FIR) an thehlut.

MZP chuan, Mizoram Agro & Allied Products neitu chu Solomon Vala s/o Lalhmingthanga a ni tih tarlangin, "Zirlaite harsatna chu, course fee lak loh tur tih chu thla tinin course fee a la thin a, zirna a mumal lo hle a, course neih loh pui a zirtir a, pawisa tam tak a la ṭhin," an ti a; zirlai awm si lo (zirlai lem) ṭhahnem tak a nei a, chu'ng hmang chuan sorkarah hamṭhatna a dil ṭhin a, zirlaite chu certificate lem leh marksheet lem a siamsak ṭhin niin an tarlang.

MZP chuan, Mizoram Agro & Allied Products chu sorkara an registration titawp nghal turin Mizoram sorkar an ngen a; Mizoram Agro & Allied Products neitute chu an zirlaite aṭanga fee chi hrang hrang an lak tawhte chu zirlaite hnena pe kîr leh vek tura an ngen nghalin, "Kan ngenna hi tihhlawhtlin a nih loh chuan dan anga hrem a nih theih nan hma kan la zel dawn," an ti.

MZP chuan, Apollo School of Nursing zirlai batch 12-nate'n screening an neih chungchanga harsatna an tâwk chu pawi an tih thu an tarlang bawk a, "Board of Director chunga an lungawi lohna kal zelah zirlai 15-in FIR an thehlut a, FIR an thehluh ang hian thu dik hai lan a nih a, a tidik lote chungah an phu ang tâwk hremna pe ngei turin thuneitute kan ngen a ni," an ti. Zirlaite'n zirna an kalpui vat theih nana hma la thuai turin Apollo School of Nursing thuneitute a ngen bawk.