MNF-in an FIR thehluh bawhzui

MNF Vigilance department chuan, nimin khan Mara Autonomous District Council (MADC)-a Congress sorkar sum hman chhui chiang tura October 26, 2016-a Anti Corruption Bureau (ACB)-a FIR 10 an thehlut bawh-zuiin nimin khan ACB SP John Zothansanga a pisaah an kâwm.

MNF Vigilance department secretary J Lal­remruata Hmar chuan, ACB SP hnenah hian an FIR thehluh bawhzui a nih dan an zawt a; ACB SP chuan inquiry an kalpui mek thu sawiin, "Preliminary inquiry kan la zo lo a, April-May, 2017 velah chuan zawh theih kan inring," a ti.

MADC-a Centrally sponsored scheme (CSS) sum cheng nuai 3200 chuang dik lo taka hman a nih chungchang chhui chiang turin MNF Vigilance department chuan Lalrindika leh H Lalhlimpuia te hmingin October 26, 2016 khan ACB-ah FIR an thehlut a ni.

MNF chuan an FIR thehluh chu preliminary inquiry mai ni loin, thubuai tak tak siam a hun tawh hleah an ngaih thu an sawi a, "FIR-ah hian dik lo taka pawisa hman a ni ngei a ni tih lanna document ṭhahnem tak chilh tel a nih avangin police lam pawhin chak zawkin hma la se kan duh hle," an ti.