Mamit College-a zirtirtu transfer order copy Mamit MZP-in an hâl

MZP headquarters, Mamit chuan tun hnaia Mamit College-a assistant professor pakhat thlaktu awm loa sawn tum a nih duh loh lantir nan nimin khan Mamit Tennis Court-ah transfer order an hâl. Transfer order sût nan March 6 thleng sorkar an nghak dawn.

Transfer order copy hâlnaah hian Mamit MZP president Lalropuia chuan, Mamit College-a assistant professor Lalrinchhana, Education department chu thlâktu awm loin Serchhip College-ah sawn a ni tih sawiin, "Pawi kan ti a, khawthlang zirlaite thamlohna leh hmuhsitnaah kan ngai," a ti.

Lalropuia chuan, assistant professor Lalrinchhana chu sorkarin a thlaktu a ngaihtuah a, an rawn dah nghal dawn a nih chuan sawn chhuah a nihnaah sawi buai an tum loh thu a sawi a, "A aiawh tur dah a nih dawn loh chuan, sorkar thuneitute hian transfer order hi hnûk kîr turin kan ngen. Thlaktu awm loa Mamit College lecturer sawn hi kan remti ngai dawn lo," a ti a; transfer order copy hâl a ngai chu pawi an tih thu a sawi.

Mamit MZP hian Mamit College-a assistant professor pakhat transfer order chu March 6, 2017 ral hmaa sût turin sorkar an phût a; an hun tiam chhunga sût a nih loh chuan a ṭul ang zela hma an lak tur thu an puang.