KHAWTHLIR

Mizoram Board of School Education (MBSE) chuan naktuk chhun dar 12 hian Higher Secondary School Leaving Certifcate (HSSLC) Examination, 2020 result leh HSLC Compartmental Examination result tih­chhuah a tum. Result hi Chaltlanga MBSE office, Lungleia MBSE regional office leh MBSE website - www.mbse.edu.in-ah en theih a ni ang.

Leitan Branch KṬP chuan July 11, Inrinni khan Synod Hospital Blood Bank-ah blood donation camp an huaihawt a, mipa 21 leh hmeichhia pathumte'n thisen unit 24 an pe.

Higher & Technical Education minister Dr R Lalthangliana chuan, sorkar laipuiin Unlock-2 inkaihhruaina a siamah July 31, 2020 thleng zirna-in zawng zawng hawn a la khap avangin Mizorama college leh institution-te bakah, Mizoram University chu khâr chhunzawm a ni dawn tih a puang a, "Sorkar laipui thu leh hla ngaichâng chung zelin zirna-in hrang hrang hawn theih hun tur la ruahman a ni ang," a ti.

Serchhip kiang Mat lui phaia Chawm zau panna kai, Chawm Kai tia sawi hmuna thir lei (Gal­vanised Bailey Bridge) leh Thenzawl leh Buarpui inkara Tlawng lei Steel D-Bow Trussed Girder Bridge dawh thar chu tunhnai khan PWD engineer-in-chief K Lalsawmvela'n a hawng. Chawm Kai hmuna lei hi NEDP sum cheng nuai  513 senga dawh a ni. Tlawng lei hi cheng nuai 195 senga dawh a ni thung.

Pachhunga University College (PUC)-a B.A, B.Sc., B.Com. leh BBA zir duh tan online hmang­in admission dil theih a ni a, July  14, 2020 chawhnu dar 1 

aṭangin https://pucadmission.mizoram.gov.in/#/admission-form/information ah application form thehluh theih a ni ang. Admission chung­chang hre chiang duh tan https://pucollege.edu.in/page/online-admission ah en theih a ni bawk.

Ruahsur nasa vangin nimin zing khan Mamit district-a Lallen khaw hnuaia leiminin Marpara panna kawngpui a hnawh ping a, lirthei a kal tlang thei rih loa thu dawn a ni.

National Highway-44A kawngpuia Dárlâk lei (bailey bridge) chu PWD-in nimin aṭang khan thawm ṭhat hna an thawk ṭan a, hei vang hian lirthei leh mihring kaltlang theih a ni rih lo. Mamit SP Shashank Jaiswal chuan, Darlak leiah July 12-21, 2020 chhung lirthei leh mihring kaltlang phal a nih loh thu a puang a ni.

Local Administration department chuan, Darlawn RD Block chhunga Vervek Damdiai khua chu a hming an thlak a, East Damdiai tih a nih tawh tur thu an puang. Hemi chungchangah hian LAD chuan July 9, 2020 khan hriattirna a tichhuak a ni.

Aizawla mi ṭhahnemngai intél khawmte chuan July 11, Inrinni khan Lalkiamlova in, Tuikual South-ah kum 130-a upa Aizawl khawpui faina leh thianghlimna kawnga hma latu tur ‘Clean Aizawl Mission’ an din a, hruaitu an inruat nghal. He pawlah hian Aizawl faina leh thianghlimna kawnga hmasawn zel duhtu, a duh apiang tel turin an sáwm a ni.