Samagra Shiksha hnuaia thawkte Dinhmun zirchianna report thehlut

Mizoram Samagra Shiksha-a thawkte dinhmun zir chiang tura din Study Group chuan nimin khan School Education minister Lalchhandama Ralte hnenah an zirchianna report an thehlut.

Lalchhandama Ralte chuan, Study Group-te report chu sorkarin a zir ang a, bawhzui theih turte sorkarin a thlir tur thu a sawi a, "Hripui léng vangin report hi ûmzui chak a har deuh dawn tih erawh FEMSE pawhin lo hria se, Mizoramin sorkar laipui aṭangin sum a dawng ṭha lo a ni," a ti a; Samagra Shiksha hnuaia thawkte hlawh tur Central-in a rawn pek ṭhat theih loh thu a sawi.

Study Group report-a a lan danin, Samagra Shiksha-ah hian SSA zirtirtu 2,326 leh RMSA zirtirtu 517, an vaiin mi 2,843 an awm a; sorkar enkawl sikula zirtirtu awm zawng zawng aṭanga chhûtin Samagra Shiksha hnuaia thawkte chu 19.2% an tling.

Kum 2019 tàwp lam khan FEMSE chuan an hlawh leh dinhmun siamṭhat phûtin mass casual leave an la a, sorkar nena an inbiaknaah an lungawi lohna te, an hlawh leh service dinhmunte en chiang turin study group din ni se, an ti.

Mizoram sorkar chuan School Education joint secretary K Sangṭhuama kaihhruai study group chu December 20, 2019-ah a din a, member dang pali an awm a ni.