December-ah inhawn chhâwk loa Dawr hawn vek MIMA-in an duh
Mizoram Merchant Association (MIMA) chuan thuchhuah siamin, December thla chhungin dawrte inhawn chhâwktir lo a, inhawntír vek an duh thu an tarlang.
MIMA chuan, Covid-19 hripuiin Mizoramah zual lam a pan zel karah, ni tam tak dàwr an hawn theih loh avangin sumdawngte dinhmun a chhe tak zet tawh niin an sawi a, "Kan mi chhawrte hlawh leh dâwr luah man leh ei leh bâr ngaihtuah a manganthlak a, harsatna ruamah kan tlu lut mek. Hna kan thawh theih ngei a ngai tawh a ni," an ti a; sumdawng tam zawk chu loan rulh ngai an nih thu an sawi.
Chhan hrang hrang avangin December thla, kum tluana an nghahfâk ve berah inhawn theih ngei an duh tih sawiin MIMA chuan, "Ni tin eibàr dap chawpte ngaihtuah chunga roreltute hian rorel ṭhin turin MIMA chuan a ngenin a phût tlat a ni," an ti.
MIMA chuan, khawtlangah sum vir vêl a tlem chuan a zár zotu an tlem ṭhin tih sawiin, "Kan sum dinhmun a chhiat tâk em avangin sum léng vel a tlem tial tial a, chu chuan kár loah ram dinhmun a tihniam em em a, kan hniam thla zel niin a lang," an ti a; sorkar laipui pawhin economy a chhiat lutuk a hlauh avangin lockdown a phal tawh lo tih an tarlang.
MIMA-in dàwr hawn an duh chhante
1. March thla aṭangin dawr hawn a mumal lo a, ni tin ei chawp zuar leh damdawi lam zuar tih loh chuan kan tuar nasa tawh hle. Dawr kan khâr hian pawisa kan hlawh chhuak lo (hloh) mai ni loin, kan chawi belh char char a ni. Dawr luah man leh kan naute hlawh kan pek tho a ngai. Hri hian eng chen nge min la chèn chilh dawn hriat a ni lo a, chawi belha kal ngar ngar har kan ti tawh a, fimkhur tak chunga eibàr zawnga hna thawh theih kan duh.
2. Dawrkaite ni inchhâwka dawr hawn, dawr A & B anga inhawn chhâwk hian a inhawng chhunah social distancing zawm a har phah zawk, dawr inhawng chhun kha miin a pan ngei ngei a ngaih vang a ni. Mahni duh awmna dâwr a inkhâr avangin dawr danga a zawn kual chiam a ngai a, vahvelna a titam zawk a; dawr inhawn leh hawn loh hriat loh vangin vawi khat kala tlâk mai theih kha vawi hnih kal a ngaih phah thei bawk.
3. Dawr inhawn hun chhung a rei loh hian, inhawn hun rei lo têah mi an inhnawh chêp. Hnathawh hun tlem lutuk hian mipui tan chhuah phal hun chhunga chhuah dual dual a ngaih phah zawk a, chuvangin, dawr hawn hun hi pawh sei hret ṭha kan ti.
4. Sumdawng tam zawkte'n kan nghahfâk December thla hi lockdown puang mai lo a, fimkhurna thlahthlam chuang loa sumdawnna leh ei leh bàr zawng thei leh, a harsa zawng ngawta ngaihtuah lo a, a awlsam zawng leh mipui vantlang, ni tin ei chawp dapte tana hun tháwl zawk kan sorkar hian min ngaihtuahsak ngei se kan duh. Lockdown vanga kan bungrua hralh loa awm mai maite hi a chhiat ai chuan, man tláwm zawka sale pawh kan duh a, sorkar hian hun min siamsak ngei rawh se.