Dec. 1, 2020 - Jan. 10, 2021 chhungin Covid-19 No Tolerance Drive leh dawn

Covid-19 No Tolerance Drive kalpui mek December 1, 2020 aṭanga January 10, 2021 chhung kalpui chhunzawm a ni dawn. Hemi chungchangah hian State Disaster Managment Authority (SDMA) hnuaia State Executive Committee chairman Lalnunmawia Chuaungo, chief secretary-in nimin khan hriattirna a tichhuak a ni.

Covid-19 No Tolerance Drive kalpui mek chu November 30, 2020-a tàwp tur a ni a, December 1 aṭangin ni 41 chhung kalpui zui a ni dawn a ni. Chief Secretary chuan December 1, 2020 - January 10, 2021 chhunga kaihhruaina tur a tichhuak nghal bawk.

December leh January thlaa Covid-19 No Tolerance Drive chhungin district khawpuiah zan dar 8 aṭanga zing dar 4:30 inkar curfew a ni zel dawn a; Krismas leh kumthar laiin sorkar programme pawimawh bik tih loh programme huaihawt phal a ni lo.

Biak-ina inkhawm phal a ni lo a, zing ṭawngṭai inkhawm erawh phal zui niin, mi 35 aia tam lo tel theih a ni. Mitthi vuina leh inneihnaah mi 35 aia tam punkhawm phal a ni lo. Dawr leh sumdawnna hmunte hawn vek phal a ni a, inhawn chhâwk a ni tawh dawn lo; damdawi dawr tih loh zawng chu tlai dar 5 hmain khâr vek tur a ni.