Chapchar Kût hlim taka hman a ni

Mizote kût pui ber, Chapchar Kût chu nimin khan Mizoram hmun hrang hrangah hlim taka hman a ni a, Aizawlah chuan Lammualah hman niin, Mizoram mipui bakah, Myanmar, Bangladesh, Tripura, Manipur leh Meghalaya aṭangin Zo hnahthlak eng emaw zat an rawn tel.

Lammuala Chapchar Kût hmannaah hian Art & Culture minister R Romawia chu Kût Thlengtu a ni a, Chief Minister chu Kût Pa a ni.

Lal Thanhawla chuan, Chapchar Kût chu Zo hnahthlak zawng zawngte an awmna hmun ṭheuhah chhûl khat kual an ni tih hriat chhuahtirtu ni se a duhthu a sawi a, "Chhûl khat kual kan ni tih hriat ṭheuh hi a pawimawh," a ti.

CM chuan, Chapchar Kût chu inremna ní, intithiam lote'n inngaihdamna nía an hman ṭhin thu sawiin, "Kût pual hian Zo nun ze mawi thar chhuah leh ni se, rinawmna, dikna, takna leh Pathian ṭihna nena nun kan mamawh," a ti a; Zoram thar, Zoram nuam siam turin mi tinin mawh an phurh thu a sawi.

Chapchar Kut chu Zoram tan mawh­phurhna kan nei vek a ni tih hria a, mipuiin an nunpuina ní a nih chuan kût hlawhtling tak a nih tur thu sawiin Chief Minister chuan, Chapchar Kût thupui, 'Aia upate zah' tih ngai pawimawh chunga hlim taka hmang turin mipuite duhsakna a hlan.

Kût Thlengtu R Romawia pawhin thu sawiin, mipuite chu kût thupui 'Aia upate zah' ngai pawimawh turin a sáwm a; hlim taka kût hmang turin duhsakna a hlan.

Central YMA president Lalbiakzuala chuan, Chapchar Kût chu Zo nun ze mawi nunpui tharna ní ni se a duh thu sawiin, "Inremna kût a nih ang ngeiin Chapchar Kût hian mi tipumkhat se, politics leh kohhran thurin vanga inremna lohte bànsanna níah i hmang ang u," a ti.

Lalbiakzuala chuan, Chapchar Kût chu pi leh pute thuam ang inbelna ní atan ringawt hmang lo a, pi leh pute nun ze mawi zawm thar lehna ní atana hmang turin mipuite a sáwm a ni.

Lammuala Chapchar Kût hmannaah hian Mizo hnam nun leh hnam ziaráng tilang thei thil chi hrang hrang mimal leh pawl hrang hrangin an entir a, zai leh lám ngaihthlak leh en tur a awm bawk.

Chapchar Kût pual hian Lammuala hun hman a nih bakah, Food Fest, Handloom Exhibition, Photo Exhibition leh Flower Show-te buatsaih a ni.