Pediatric surgeon-te'n khawmpui hmang

North East Chapter of Indian Association of Pediatric Surgeons (NEIAPSCON) chuan Ningani zan khan Aijal Club-ah inkhawmpui an hmang a, Health minister Lal Thanzara'n a hmanpui.

Health Minister chuan, India hmarchhak pum huap pediatric surgeon intèlkhawmna pawl pawimawh takin kum tina an hman ṭhin inkhawmpui nghah nan Mizoram an thlang chu a lawmawm a tih thu a sawi a, "Mihring nunna chhan thei khawpa mithiam rual kal khawmte hian in mawhphurhna sanzia hria a, khawngaihna, dawhtheihna leh inpekna thar nen hna in thawh a pawimawh," a ti.

Lal Thanzara chuan, hmarchhak biala chengte zingah sum harsatna vangin inenkawlna ṭha dawng pha lo tam tak an awm tih a sawi a; conference an hman mek chuan Mizoram leh India ram hmun danga doctor thiamte'n inzawmna leh thawhhona ṭha zawk hring chhuak a, damlote tana zau zawka malsawmna an nih theihna kawng hawng se a duh thu a sawi bawk.

Inkhawm hi organi­sing chairman Dr. Saia Chenkual-in kaihruaiin, North East Chapter secretary Dr. R Kikon chuan report a pe a ni.

Khawmpuiah hian state pawn atangin pedia­tric surgeon sawmpanga lokalin Indian Pediatric Surgeons Association aiawh mi pahnih an rawn tel a ni.

NEIAPSCON in­khawm­pui hi vawiinah a ṭiak dawn a, Aizawl Civil Hospital-ah thupui thlan bik hmangin seminar neih a ni ang.