GST hman ṭan hun sawn a ni

Good & Services Tax (GST) chu April, 2017 aṭanga hman ṭan tura ruahman ni mah se, tihfel hman a nih loh avangin July, 2017 aṭanga hman ṭan tura tih a ni.

Taxation department hotute hnen aṭanga thu dawn danin, Union Finance Minister kaihhruai GST Council chu March 4-5, 2017 hian New Delhi-ah an ṭhukhawm leh dawn a, chutah chuan GST hmang thei tura thil ṭulte chinfel theih beisei a ni. GST Council-ah hian Finance minister Lalsawta pawh member a nih angin a tel ang.

GST atan hian Parliament remtihnain Constitution siam danglam a ni tawh a; mahse, hmang tak tak tur chuan Parliament remtihna a ngai leh dawn a, March thlaa Parliament session-ah sorkar laipui chuan put luh hman an tum.

State sorkar leh sorkar laipuiin GST hnuaia thuneihna an neih dan tur chu chinfel a ni tawh a, cheng nuai 150 hnuai lam chin la lutah chuan state leh sorkar laipuiin 9:1-in chan an insem dawn a, cheng nuai 150 chin chung lam la lutah chuan state leh sorkar laipuiin 50:50-in an insem ang.

State leh sorkar laipui insem dan tur hi sum hmuh chhuah aṭang ni loin, a firm-in a ni dawn a; cheng nuai 150 la lut 100 an awm a nih chuan state-in firm 50 leh sorkar laipuiin firm 50 an chang ang.

Hetih lai hian, chhiah lak zat tur tihfel a la ni lo a, vawiina GST Council ṭhutkhawm hunah tihfel theih beisei a ni.

Taxation department hotute chuan, GST tihfel hma a ṭul tih sawiin, "VAT hi September thla thleng chauh hman theih a ni dawn a, hemi hmaa GST hman a nih loh chuan VAT la chhunzawm zel tur chuan Constitution tihdanglam a ngai dawn a ni," an ti.