Hmun hrang hrangah Chapchar Kût hmang

Nimin khan Mizoram hmun hrang hrangah Chapchar Kût lawm a ni a, hlim takin hun hman a ni a; hnam lâm leh zaite leh hmanlaia Mizo nunphung tilang theite entir a ni.

Lungleiah chuan Ṭhuam­luaiah Mualah hman a ni a, Lunglei HPC vice chairman S Laldingliana, MLA Kût Pa a ni. S Laldingliana chuan, Zo hnahthlak hnam hrang hrangte phuar khawmtu chu Mizo nihna a nih thu sawiin, "He Kût avang hian hnam hrang hrang inkarah inunauna ṭha a piang mek zel a. Chapchar Kût thupui ‘Aia upate zah’ tih hi Mizo nun ze mawi kan neih tam takte zinga duhawm ber pakhat a ni a, chhawm nun zel tlak a ni," a ti.

Lungleiah hian Chapchar Kut Miss atan Vanlalnunpuii d/o Rev. JC Vanlalluaia, Electric Veng thlan a ni.

Siaha-ah chuan District Play­ground-ah lawm a ni a, sorkar department hrang hrang leh tlawmngai pawl aiawhte inhrui­pawh hmangin an intihsiak a; kût puala intihsiakna hrang hranga ti ṭhate hnenah lawmman sem a ni.

Champhaiah chuan Chapchar Kût hi Kahrawt Field-ah lawm a ni a, Lalrinliana Sailo, MLA chu Kut Pa niin, DC Vanlalngaihsaka chu Kut Thlengtu a ni.

Lalrinliana Sailo chuan, Mizote chu thlahtute aṭanga tlawm­ngaihna leh aia upate zah­thiam hnam kan nih thu sawi­in, "Hei hian kan ni tin khaw­sak phung min chhâwk zâng­khai a, vawiin thlengin hnam dangte entawn kan nih bakah, aia upa zah hi ringtu nun nena thil inhmeh tak a a ni," a ti.

Kolasib-ah chuan minister Zodintluanga hoin Ṭumpui Field-ah hman a ni a; Zodintluanga chuan, kût thupui 'Aia upate zah' tih chu thinlunga vawng a, aia upate zaha chawi nung thar zel turin kalkhawmte a fuih.

Chapchar Kût thupui pualin kum 75 chin chung lam tan

ṭhutna bik siam a ni a, kût chhimtu zinga mipa leh hmeichhe upa ber RL Manga (94) leh Zikpuii (89)-te hnenah chawimawina thilpek hlan a ni.

Lawngtlaiah chuan DC pisa tualah Chapchar Kut hman a ni a, LADC chief executive member VL Hmuaka chu Kut Pa niin, Siaha DC Dr A Muthamma chu Kût Thlengtu a ni. VL Hmuaka chuan, pipute'n kût laiin nupa, chhungkua leh ṭhenawm khawveng inhauh leh intihbuai an duh lo tih sawiin, "Vawiin pawh hi inremna ní-ah hman ngei ni se a duhawm hle," a ti.

Mamitah chuan minister John Rotluangliana hoin GSA Playgorund-ah hman a ni. John Rotluangliana chuan, "Kan pipute hun laia an nun zia zawng zawng kha chhawm vek thei tawh lo mah ila, Mizo kan nihna chu kan thinlungah a awm tlat tur a ni," a ti a; ram changkang apiangin an hnam nun dan an humhalh a, an chawi nung ṭhin tih a sawi.

Mamitah hian naupang inchei thiam leh kum 60 chung lam Mizo thuama inthuam nalh berte tan lawmman siam a ni.

Sialhawkah pawh Home minister R Lalzirliana hoin hman a ni a; Kût Pa chuan, "Hnam inthuam mawi tak tak kan inbel hi páwn lam mawina atan chauh duhtawk loin, kan hnam nihna leh nun zemawi inthuam hian kan nun chhungrilah ṭheuh kan inbel tur a ni," a ti a, aia upa zah thei lo khawpa mi ropui an awm theih loh thu a sawi.

Zobawkah pawh bialtu MLA Joseph Lalhimpuia hoin lawm a ni a; Zobawk Chapchar Kut Miss atan Lalrohluzuali, Zobawk Venglai thlan a ni.