KHAWTHLIR

Minister-in tlawh
Rural Development (RD) minister R Lalzirliana chuan, Ningani khan East Lungdar RD Block-a Capacity Building and Skill Development, Employment Generating Scheme hnuaia puanṭhui leh carpentry training kalpui mek a hmunah a tlawh. Capacity Building and Skill Development, Employment Generating Scheme hnuaiah hian puanṭhui leh carpentry bakah, puahtah la kalpui leh tura ruahman a ni. Tunah hian puanṭhui zir mi 31 leh carpentry zir mi 50 an awm.

Ṭanpuina sem
Hortoki-a Industry department hnuaia handloom cluster training zo tawh mi 50 hnenah, Ningani khan puantahna in (weaving shed) sakna tur ṭanpuina Rs. 26,000 ṭheuh chu bialtu MLA Hmingdailova Khiangte-in a sem. Weaving shed hi sak zawh a nih hunah puantahna hmanrua pek leh an ni ang.

Heroin man
Excise & Narcotics department-a Anti-Narcotics Squad-te chuan March 2, 2017 zan dar 6:30 khan Edenthar, Selingah heroin gram 52 (hawng 4) leh a neitua puh mi pahnih - Lalhmunliani (27) d/o Lalramzauva, Bawngkawn leh Lalramchangi (24) d/o K Savunga, Ṭiau, Myanmar nia inchhálte an man.

Sakhi sa man
Champhai District Wildlife Crime Patrol Unit member-te chuan, nimin khan Champhai Zote daia sakhi sa an man a, Champhai DFO office tualah an hal ral nghal. Sakhi sa hi Myanmar aṭanga lakluh, kg. 15 a ni a, tual chhunga hralhna ang chuan Rs. 4500 man vel a ni.

Lungphùm phúm
Champhai Vengsang Branch YMA Hall sakna tur lungphùm chu, Ningani khan bialtu MLA TT Zothansanga'n a phúm. Vengsang YMA Hall hi tuna an hall luah lai mek bula sak tura ruahman a ni.

Zathangvunga thi
Zathangvunga (74) chu nimin zing dar 7 khan Churachandpur-ah zunthlum avangin a thi. Zathangvunga hi Pathian thuhriltu, ama puala pawl neia zuitu engemawzat nei a ni.