Ram enkawl zo lo-ah Modi puh
Congress party ṭhalaite chuan thuchhuah siamin, prime minister Narendra Modi kaihhruai sorkar laipuiin India ram a enkawl zo lo niin an tarlang a, "Ni tin mamawh man nasa takin a sang chho a, mi rethei zawkte harsatna nasa takin a thlen mek," an ti.
MPYCC chuan, tun hnaiah eirawngbawlna gas man (subsidy loh bikah) Rs. 86-in a pung tih sawiin, "India rama gas man vawi khata tihsan nasat ber tum a ni," an ti a; Narendra Modi chu thiam taka mipui sum rawkah puhin, India ram a enkawl zo tawh loah leh ram ei leh bar enkawlna kawnga hlawhchham let dêrah an puh a ni.
Congress ṭhalaite chuan, sorkar laipuia BJP leh an thawhpuite'n India rama sorkarna an chan hnuah gas man ṭum ruk an tisang tawh tih sawiin, "Nikum October thla aṭanga gas man an tihsanna hi 58% a tling tawh. Hetiang taka mipuiin engtiklai pawha an mamawh gas man tihsan nasat hi India ram history-ah a la thleng ngai lo," an ti.
MPYCC chuan, sorkar laipuiin thiam takin mipui sum an rawk reng a, indirect tax tihpun, rêl chuan man tihsan, tuialhthei man tihsan leh gas man tihsan aṭangtein mipui sum nasa takin an rûksak niin an tarlang.