Mipuiin Cong an ning tawh - Dr Thangtea

MNF vice president Dr R Lalthangliana chuan, MNF-in Pathian leh mipuite zarah sorkar loh hlauhna an nei lo niin a sawi a, "Congress sorkar hi mipuiin an ning tak zet tawh a, kum 2018 Inthlanpuiah hian an tlak loh chhan tur a awm lo. MNF zawng zawng hian Congress sorkar leh nan campaign pui vek mah ila an tling tawh chuang lo ang," a ti.

Hrangturzo East Block MNF-in nimina Mualcheng community hall-a conference an neih a hmanpuinaah Dr R Lalthangliana chuan, "Congress sorkar zu zawrh vangin hmeithei leh fahrah khawngaihthlak tak tak an pung nasa em em. Hmasawnna hmuh tur alawi a awm lo a, sorkar hnathawkte pawhin an ning em em a. Kohhran, zirlai leh mipuite duh loh zawng an ti nasa em em a ni," a ti a; Congress party tan tlin leh ngaihna a awm tawh lo niin a sawi.

MNF Vice President chuan, "Pu Zoramthanga hoin mipuite tan buh zém thar kan hung dawn a ni," tiin, MNF economic policy thar, Socio Economic Deve­lopment Programme (SEDP) chu NLUP nen a inan loh thu a sawi a; "NLUP chu Congress party-in vote zawn nan leh inthlana tlin nan chauh an hmang a. SEDP hi chu Mizo mipui zawng zawng huap zo tur, mipuite din chhuahna tur tak tak a ni," a ti.

MNF thuchhuah chuan, Hrangturzo East Block MNF conference-ah hian khaw pakua aṭangin MNF zawm thar mi 137 an lawm lut niin a tarlang.