Chief secretary atan Mizo ngei duhin NGO-in CS pisa kai tur an dang dawn

Tlawmngai páwl panga - Central YMA, MUP, MHIP, MZP leh MSU intêlkhawmna NGO Coordination Committee chuan Mizoram chief secretary atan Mizo dah tura an ngenna sorkar laipuiin an tihhlawhtlin loh avangin vawiin aṭangin chief secretary Dr Renu Sharma pisa kai tur an dang dawn.

NGO Coordination Committee (Joint NGO) hruaitute chuan nimin khan Aizawl Press Club-ah thuthar thehdarhtute an kâwm a; an chairman R Lalngheta, CYMA president ni bawk chuan, "Mizoram chief secretary dinhmun luah tura Mizote tling kan awm reng lai leh NGO Coordination Committee-te'n sorkar laipuia kan ngenna ngaih pawimawh a ni lo hi hnam tlém zawkte dinhmun hriatthiampui lohnaah kan ngai," a ti.

R Lalngheta chuan, chief secretary-ah Mizo ngei an awm theih nan Vice President, Prime Minister, Governor, Union Home Minister leh Ministry of Home Affairs hotute hnenah ngenna ṭum eng emaw zat an thlen tawh thu sawiin, "Kan ngennate hian ngaih pawimawh a hlawh lo," a ti a; chief secretary ni mek Renu Sharma chu mimal taka dona an neih loh thu a sawi.

Joint NGO hruaitute chuan, chief secretary tur Mizo IAS an awm reng lai leh, sorkar leh mipui aw ngaithla duh loa sorkar laipui hmalakna zawm har an tih thu a sawi a, "Mizo chauh chief secretary-a awm turin beisei theih a ni lo tih kan hmuhpui a, tling leh thei an awm chhung chuan ram leilung fa Mizote duhsak kan phût thung. Mizo hnam tan, ram leh hnam tan kan ding zel dawn," a ti.

NGO Coordination Committee chuan vawiin aṭangin chief secretary Renu Sharma pisa kai tur an dang dawn a, an dan hun chhung tur chu tiamchin awm lo a ni. An thil phût a hlawhtling lo a nih chuan an kal zel dan tur an la ngaihtuah ṭha leh dawn a ni.

Joint NGO hruaitute sawi danin, all India service cadre hran Mizoramin a neih theih nan Vice President, Prime Minister, Union Home Minister-te hnenah ngenna an thehlut tawh bawk.

Tarlan tawh ṭhin angin, chief minister Zoramthanga pawhin Mizo ṭawng thiam ngei chief secretary a duh thu a lo sawi tawh a, Prime Minister leh Union Home Minister pawh a ngen tawh a ni.

Thu dawn danin, tun dinhmunah Mizo zingah chief secretary ni thei pahnih an awm a, Lalbiaktluanga Khiangte leh JC Ramthanga an ni. JC Ramthanga chu vawiin May 31 hian a pension dawn a; Lalbiaktluanga Khiangte chu Jharkhand cadre a nih avangin Mizoram chief secretary ni turin Ministry of Home Affairs phalna bakah, a state (Jharkhand) sorkar remtihna a ngai thung.