RTI Act zâwm ṭha lote MIC-ah an inlan
RTI Act Section 4(l)(b) zâwm ṭha lo sorkar department leh agency 11 hotute chu nimin khan Mizoram Information Commission (MIC)-a chief information commissioner Lalnunmawia Chuaungo leh information commissioner Zorammawia hmaah an inlan.
MIC pisaa inlan sorkar department leh agency 11, RTI Act Section 4(l)(b) zawm ṭha lote chu - PHE department, Labour, Employment, Skill Development & Entrepreneurship (LESDE) department, Irrigation & Water Resources department, Printing & Stationery department, Directorate of Economics & Statistics, State Election Commission, Aizawl DC Office, SIPMIU, ZIDCO, MIZOFED leh FOCUS-te an ni.
RTI Act, 2005 Section 4(l)(b) angin, public authority/sorkar department-te chu an hnathawh chungchang mipuiin awlsam zawka an hriat theihna tur point 17 tarlangin an department/office website-ah dah ngei tura tih an ni a; chumi bawhzui chuan MIC chuan January 19, 2022 khan order a tichhuak.
MIC-in order a tihchhuahah chuan, sorkar office hrang hranga Departmental Appellate Authority (DAA) leh State Public Information Officer (SPIO)-te chu RTI Act, 2005 Section 4(l)(b)-in a phût angin suo motu disclosure ti vek tur leh February 28, 2022 aia tlai loah an hmalaknate MIC Secretary hnena thehlut tura hriattir an ni. Order copy chu Chief Secretary pawh pek niin, sorkar department-te'n an zawm leh zawm loh hriatpui tura ngen a ni.
Sorkar department hotute leh SPIO-te chu RTI Act Section 4(1)(b) angin, mipuiin an zawh kher ngai loa an department hmalakna leh an hnathawh chungchang an website-ah dah ngei tura hriattir an ni a, harsatna an neih chuan MIC beráwn tura chah an nih bakah, website-ah an dah ngei em tih MIC-in a endik zui dawn tih hriattir an ni bawk.
Hetih lai hian, hmalaknate ṭha taka tarlang department/office eng emaw zat an awm a, chu’ngte chungah chuan MIC chuan lawmthu a sawi a ni. Nimina department/agency 11 hotute koh an ni hi a vawi hnihna a ni a; a vawi khatna, April 6, 2022 khan MIC phût anga an hmalakna thehlut ve lo zinga department lian zual 10-a hotu lu (head of department) leh SPIO ṭheuh an lo inlan tawh a ni.