May 27-a grape wine man zat ûm 6,921 ; Grape wine hralh phal turin sorkar phût

May 27, 2022 (Zirtawpni)-a Excise & Narcotics department (END) mite'n Mizo siam grape wine Aizawla an man chu a vaiin ûm 6,921 a nia thu dawn a ni. Hetih lai hian, Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS) chuan thu­chhuah inṭâwm siamin, zalên taka an grape wine siamte a rang thei ang bera hralh phalsak turin sorkar an phût.

Excise & Narcotics lama thawkte sawi danin, END mite'n May 27, 2022-a Aizawla grape wine an mante chu Champwine, Fanai Wine leh B.Ch Wine-te a ni a; ml. 750 ûm 3,246 leh ml. 375 ûm 3,675 a ni.

Mizo siam grape wine bakah hian, Korea siam Soju ûm 137, Dark Wine ûm 16, apple wine litre 660 leh grape wine dang litre 32 an man tel bawk nia thu dawn a ni.

CGGS leh HGGPCS chuan, kut hnathawktute grape thar aṭanga wine siam chu March 25, 2022-ah inhriatthiamnaa phal a nih thu tarlangin, "Hetiang a nih laia May 27, 2022-a kan wine siamte sorkarin min mansak ta mai hi hriatthiam harsa kan tiin, a lungchhiat thlak kan ti hle," an ti a; winery aṭanga siam grape wine Mizoram sorkarin an mante chu a bo a bâng awm loa pek lêt thuai an phût thu an tarlang.

Champhai leh a chhehvel leh Hnahlana grape chíng­tute thar hmanga winery aṭanga grape wine siamte zalên taka hralh a nih theih nan a rang thei ang bera hma la turin sorkar an phût tih tarlangin CGGS leh HGGPCS chuan, "Mizoram sorkar hian kut hnathawktute hma­khua ngaiin kan kut hnathawh rah grape wine kan siam chhuah hralh­naah eng harsatna mah min siam suh se," an ti.

CGGS leh HGGPCS chuan, kum 2022-a grape tharte chu kumin July thla chawhnu lamah seng a hun dawn tih sawiin, "Kan grape sengte dah khawmna tur fermentation tank ruak a awm lo a, kum 2022 grape seng hma ngei hian fermentation tank-a kan grape tui sâwr sa awmte hi Mizoram sorkar hian a tihral dan min ngaihtuahsak rawh se," an ti a; lungawi lohna an lantir hma ngeia an thil phûtte tihlawhtling turin Mizoram sorkar an phût a ni.