Grape chíngtute phatsanah ZPM Leader-in sorkar a puh

ZPM leader Lalduhoma chuan, an party chu an kal sual tur invéng tawn chungin Mizoram tan ṭhangthar zingah hruaitu ṭha an zawng zel dawn tih a sawi a; Mizoram sorkarin grape chíngtute a phatsan thu a sawi bawk.

Nimina ZPM party pisaa mi thar lawm luhna inkhawmah thu sawiin Lalduhoma chuan, "Ram changkang zawkah chuan term hnih bak ram hruaitu a nih theih loh, hei hi tawk an ti a, term hnih chhunga hmasawnna thlen thei lo hruaitu neih ṭul an ti lo. Keini pawh kan kal sual tur invéng tawn chungin Zoram tan hruaitu ṭha zawk ṭhangthar kan zawng zel ang," a ti.

Lalduhoma chuan, chung lam puihna an dawng nasa nia sawiin, "Kan boruakin hmun kilkhâwr ber thlengin a fan chhuak a, mi thar kan nei reng a ni," a ti a; kum 2023 inthlan atan ZPM-in policy a peih tawh thu leh sorkarna siam turin an inpeih tawh thu a sawi.

Grape chíngtute tawrhna chungchang sawiin Duhoma chuan, "Kut hnathawktu grape chíngtute hi sorkarin a phatsan a ni. Grape chungchang hi SEDP bu-ah pawh ziah lan a ni a, hetiang mai maia sorkarin a phatsan leh dawn a nih chuan zangnadawmna a pe tur a ni," a ti a; grape chungchangah ZPM-in aw an chhuah tawh tih sawiin, "Kan dinna ngaiah kan la ding reng. Grape chíngtute hi lo tuar hrâm hrâm a, ZPM sorkar hun lo nghak turin kan chah a ni," a ti.

ZPM Leader chuan, six basic needs chu tuipuitu mi tam tak an la awm thu sawiin, "He policy lo vahvaihpuitute zawng zawng ZPM-ah lo haw khawm a hun ta. Rim taka thawka in tuh rah seng turin ZPM-ah in tan hmun a awm,” a ti. Manipur sorkarin Manipur Zo fate ram chhungah forest reserve a puang tih sawiin, "Hetianga Zo fate'n nèkchêp an tâwk mek leh an harsatna awm theite hi kan hriatpui a, an hnungah kan ding reng a ni," a ti a, an tih theih ang ti turin an inpeih thu a sawi.