Covid-19 vanga naupang baihvaite hnenah ṭanpuina pawisa sem a ni

Covid-19 vanga naupang harsatna tâwkte tana buatsaih, PM Cares for Children Scheme pualin nimin khan prime minister Narendra Modi leh Women & Child Development minister-te’n video conferencing hmangin India ram pumah hun an hmang a, naupang eng emaw zat hnenah ṭanpuina hlan a ni.

PM Cares for Children Scheme puala hun hmanna hi Mizorama district hrang hrangah video conferencing hmangin district hotute’n an chhim a ni.

India ram district 611 aṭangin PM Cares for Children Scheme dilna 9,042 a lut tawh a, chu’ng zinga 4,345 chu pawm a ni tawh. Sorkar thuchhuah tarlan danin, Mizorama district pali aṭangin naupang 14 hnenah PM Cares for Children Scheme ṭanpuina pek a ni dawn.

PM Cares for Children Scheme hian March 11, 2020 aṭanga March 3, 2022 chhunga Covid-19 vanga naupang kum tling lo, nu leh pate Covid-19 vanga thi ve ve te, nu emaw pa emaw Covid-19 vang kher loa thi tawh, mahse, a dam zawkte Covid-19 vanga thi emaw, anmahni enkawltu (legal guardian) emaw, fa atana latu (adoptive parent)-te Covid-19 vanga an thihin an thihsan naupangte dâwm kânna tura duan a ni.

PM Cares hian naupang enkawl leh venhim te, naupang hamṭhatna atana health insurance siam (PMJAY-ah thun vek a ni a, Rs 5,00,000 thleng a huam) leh zirna kawnga tihchak te, naupangin kum 23 a tlin hunah mahni intodelh thei tura thuam chakte a tum ber a ni. A bik taka scheme duan hmangin naupangin kum 18 a tlin huna cheng nuai 10 thleng a dawn theihna tur ruahman a ni.