Thingzai leh thing hmanga siamtea harsatna Sutkian nan hma la turin Governor ngen

Mizoram Wood Based Industries Owners Association (MWBIOA) hruaitute chuan nimin khan Governor Hari Babu Kambhampati chu Raj Bhavan-ah an hmu a; thingzai, thingzai leh thing hmanga siam bungraw hrang hrang state páwna thawn chhuahnaa an harsatnate sutkian a nih theih nan hma laksak turin an ngen.

Governor an hmuhnaah hian MWBIOA president C Thanchuanga, secretary PH Rama, treasurer Maggie Lalnunsangi leh committee member Chalrosanga Ralte te an kal a; an harsatnate chu chiang zawka a lo zir chian tur thu leh a ṭul angin sorkar laipuiah a theih anga nawr a tum thu Larsap chuan a lo hrilh.

MWBIOA President tarlan danin, February 2021 aṭangin Mizoramah thing kaihhnawih industry awmze neia kalpui a ni a, tunah hmun 12 velah industry awmin, February 2021 leh tun inkarah Goods and Services Tax (GST)-ah cheng nuai 77 chuang an chhûng lut tawh.

Thing hmanga an siam chhuahte chu rél hmang chauhin state páwnah phurh chhuah phalsak an ni a, rêl wagon-te awlsam taka an hawh theih loh bakah, bul ṭan tìr tan chuan sum senso a sang a, harsatna an tawk a ni.

MWBIOA hruaitute chuan, an thil siamte chu kawngpui pangngaia lirthei hmanga phur phalsak an nih theih nan Ministry of Environment, Forest and Climate Change-ah dilsak turin Governor an ngen a; Myanmar aṭanga Zokhawthar kaltlanga thingzai phurh luh a nih theih nan hma laksak turin an ngen bawk.

Hari Babu Kambhampati chuan, Mizoramah industry lian tham awm lo mah se, industry tênau, sum thawk chhuak thei a tam thei ang bera din a ṭul thu sawiin, "Ṭhalai mithiam zawkte entrepreneur ni turin a tam thei ang ber an pên chhuah a ngai. Mizoramin sum leh pai tam zawk a thawh chhuah theih nan entrepreneur tam tak a mamawh a ni," a ti.