Ni 424 hnua hripui vei hmuh tlem ber ní

May 29, Pathianni khan Mizoramah Covid-19 vei pasarih hmuh chhuah a ni a, ni 424 hnua hripui vei hmuh tlem ber ní a ni. Nimin leh Inrinni khan hripui vei dam tawh mi 38 chhuahtir an ni a, hripui vanga thi an awm lo.

Pathiannia Covid-19 positive hmuh tharte chu mipa pali leh hmeichhia pathum an ni a; RAT hmanga hmuh chhuah vek niin, positivity rate chu 15.22% a ni. RT-PCR leh FIA hmangin swab sample endik a ni lo. Kumin May thlaah hripui vei mi 845 hmu a ni tawh.

May 29-a hripui vei hmuh zat pasarih chu kum khat chuang, ni 424 hnua hmuh chhuah tlem ber ní a ni. Ni 424 kal ta April 4, 2021 khan mi pakhat chiah hmuh chhuah a ni a, ni 413 kal ta, April 11, 2021 khan mi pasarih hmuh chhuah a lo ni tawh bawk.

Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a, a záwnin ni 10 chhung thi an awm tawh lo.

IDSP record angin, Mizoramah Covid-19 vei 2,28,298 hmuh chhuah a ni tawh a, mipa 1,06,294 leh hmeichhia 1,22,004 an ni a, mipa aiin hmeichhia 15,710-in an tam zawk. Nimin tlai dar 5 thleng khan mi 2,27,477 (99.64%) chhuahtir an ni tawh a, mi 698 (0.31%) thi tawhin, enkawl mek mi 123 (0.05%) an awm.

Nimin tlai dinhmun angin, Mizoramah hripui vei enkawl lai tamna ber Aizawl district-ah mi 37 an awm a, district pathum - Siaha, Lawngtlai leh Hnahthial district-ah hripui vei an awm rih lo.